Footer

Suroten koma ti nainkappiaan a wagas

ITAY Hulio 23, naggibus ti ultimatum nga inted ti militar iti Moro Islamic Liberation Front a panangisukona dagiti nangisayangkat iti nakaam-ames a pannakapapatay dagiti 14 a marines a nakaputolan ken nakatagtagbatan ti 10 kadakuada.

Madakamat ditoy a birbiroken dagiti soldado ni naitalaw nga Italiano a padi, ni Giancarlo Bossi (naruk-atanen ni Fr. Bossi -Ed.), idi tinambang ida dagiti rebelde nga MILF a mapapati a tinulongan dagiti bandido nga Abu Sayyaf.

Ngem natangken ti sungbat ti MILF: saanda nga isuko dagiti kakaduada agsipud ta napasamak dagiti pammapatay iti “lehitimo” nga engkuentro iti nagbaetan ti nasao a rebelde a grupo ken dagiti soldado.

Kinuna pay ni Mohaguer Iqbal, chief negotiator ti MILF, a no sumrek dagiti soldado ti turay iti Basilan, sisasagana dagiti mannakigubatda a mangsalaknib iti teritorioda.

Iti baet ti panangibagbaga ni AFP Chief of Staff Gen. Hermogenes Esperon a saanda a makigubat no di dusaenda dagiti nagputol kadagiti Marines, imbilin ni Acting Defense Secretary Norberto Gonzales iti militar ti panangisayangkatda iti “punitive action” maikontra kadagiti responsable iti pannakaputol dagiti soldado no saan nga isuko ida ti MILF.

Iti daytoy a situasion, maam-amak ti panagbettak ti panagrurupak iti nagbaetan ti MILF ken dagiti soldado ti turay.

No awan ti agkir-in kadagiti dua a puersa iti pagtaktakderanda, adu a dara ti maibuyat iti Central Mindanao.

Maawatanmi ti karirikna dagiti agtuturay ti militar gapu ta aramid nga inaayup ti panangputol iti bangkay dagiti soldado ket awan ti lugarna iti sibilisado a panagbiag.

Ngem iti daytoy a situasion, saan a gubat ti sungbat tapno maited ti hustisia kadagiti napapatay a soldado.

Itoy a situasion kasapulan ti nawada a panagpanunot ken natanang a panangeddeng agsipud ta saan laeng a dagiti maibuis a biag dagiti soldado ken rebelde ti maseknan no di pay dagiti rinibu nga inosente nga umili a maipit iti panagrupak dagiti dua a puersa.

Naipadamag a naideployen ti 5 a batallion dagiti Marines iti Basilan. Sumagmamano pay a batallion ti naibaon kadagiti probinsia ti Lanao.

Ita pay laeng, nagbakuiten dagiti residente ti Ginata, Dinapa, Makaleng ken Linungan iti Basilan agsipud iti amakda a maipitda iti posible a panagrupak dagiti dua a puersa.

Iti gubat, dagiti umili ti ad-adda a biktima ti kinadamsak.

Daytoy koma ti panunoten dagiti dua a puersa ket  surotenda koma ti nainkappiaan a wagas a panangrisutda iti risiris a pinarnuay ti pannakapapaty dagiti 14 a Marines.#