Footer

Sursuroten dagiti kontrobersia ti administrasion Arroyo (Umuna a Paset)

ITI SANGUANAN dagiti alegasion nga adda napasamak a panagpasuksok kadagiti agilinlinteg, gobernador ken mamayor kas impalnaad ti kaadda ti bag a naglaon iti kuarta a naipabalon kadakuada kalpasan ti nagsina a miting a nangayaban ti Presidente kadakuada, maysa manen daytoy nga isyo a posible a pakaipasungalngalan ti agdama nga administrasion iti sabali pay a krisis.

Nakadidillaw ngamin ti pannakaitiempo ti pannakapaayab dagiti agilinlinteg, gobernador, ken dagiti mamayor iti Malakaniang idinto a kabarbaraanna ti limtuad a kontrobersia mainaig iti national broadband deal a mapapati a nangikarian ti maysa a nangato nga opisial ti Commission on Elections iti dakkel a kantidad iti maysa a kameng ti Gabinete ti administrasion tapno laeng madagdagus ti pannakaaprobar ti nasao a proyekto, panangpanggep a panangpasanud babaen ti sabali pay a pasuksok tapno agsanud ti maysa nga interesado iti pannakaipasdek daytoy met laeng a proyekto ken ti pannakairamraman ti nagan ni First Gentleman Mike Arroyo gapu iti mapapati nga ibibiangna ken uray ti Presidente gapu iti kaawan ti aksionna iti baet nga impalgak ti opisial iti babaenna iti kaadda iti nangpanggep a mangpasuksok kenkuana.

Madakamat ditoy a mismo a napan sinaksian ti Presidente ti panagpinnirma ti kontrata ti China ken ti pagilian para iti pannakaipasdek ti nasao a broadband iti pagilian, ken cyberg education a proyekto ti Department of Education.

Iti daytoy a proyekto, maipasdek iti maysa a broadband a mamagkakammet dagiti amin nga opisina ti turay ken dagiti lokal a gobierno iti sapasap a pagilian.

Ngem alegasion ti oposision a nailaw-as ti presio ti maipasdek a broadband idinto a saan a kasapulan agsipud ta adda metten nakapasdek a dua a broadband iti pagilian.

Kuna dagiti kritiko iti daytoy a proyekto nga adda dagiti sabali a rumbeng koma nga ikkan iti nangnangruna a prioridad ti gobierno kas iti pannakaipasdek dagiti pagadalan, kalsada, ospital ken  irigasion agsipud ta dagitoy ti kangrunaan a pakaseknan dagiti umili.

Limtuad ti kontrobersia kalpasan a nagriri ni Joey de Venecia III, anak ni House Speaker Jose de Venecia  Jr. gapu iti mapapati a pannakaiwalinna iti nasao a proyekto.

No patien ni ub-ubing a de Venecia, maipasdek ti broadband nga awan ti gastuen ti gobierno. Iti sabali a bangir, ipasdek ti ZTE Corp., maysa a kompania iti China a nakaitedan iti proyekto ti broadband babaen ti soft loan nga utangen ti gobiernotayo iti China .

Inakusaran ni de Venecia ni Comelec Chairman Benjamin Abalos a nangitanggaya iti $50 milion kenkuana tapno agsanud iti nasao a proyekto.

Iti panagtestigona iti Senate, imbutaktak pay ti ub-ubing a de Venecia nga intudo ni First Gentleman Miguel Arroyo sana imbaga ti panagsanudna iti proyekto. “Back off” ti balikas a kinuna ni de Venecia nga imbalikas  ni FM Arroyo.

Pinaglibakan ni Arroyo nga inaramidna dayta. Kinunana  a dina am-ammo ni de Venecia tapno pagsawanna iti kasta.

Iti met panagtestigo ni National Economic Development Administration head Romulo Neri, inlatakna a pinanggep ni Abalos a pasuksokan tapno aprobaranna a dagus ti proyekto.

“Adda 200 mo, sec,” dagita ti mapapati nga imbalikas ni Abalos, segun ken ni Neri.

Kinuna ni Neri a milion la ketdi ti kayat a sawen ni Abalos agsipud iti kadakkel ti proyekto.

Innayon ni Neri nga impakaammona ken ni Pres. Arroyo ti panangpanggep ni Abalos a mangpasuksok kenkuana.

Kinuna kano ti Presidente ken ni Neri a dina italtalek ti imbaga ni Abalos ngem aprobaranna ti proyekto.

Di mabayag, naiyalis ni Neri a kas OIC ti Commission on Higher Education.

Idi damagen dagiti senador no ania ti inaramid ti Presidente kalpasan nga imbagana ti panangpadas ni Abalos a mangpasuksok kenkuana, kellaat a nagkutim ti bibig ni Neri.

Kinunana a saklawen ti executive privilege  ti nagpatanganda ken ni Pres. Arroyo gapuna a dina kayat a sungbatan dagiti saludsod dagiti senador. Saan a nagkir-in ni Neri uray kasano a panangitebbag dagiti senador a sungbatanna ti saludsod.

Ngem iti executive session dagiti senador a nakaawisan ni Neri tapno dita a guyugoyenda a mangibaga no ania ti nagpatanganda ken ni Pres. Arroyo, segun iti maysa reporter kas maibatay iti kinuna dagiti sumagmamano a senador nga adda iti dayta a session a nakapatangna, dandani kanon rumukma ni Neri no saan a tinubngar ti maysa a senador ken ti naayaban a pannakaabogadona a maysa pay met ngarud a kameng ti Gabinete ti administrasion.

Imsiag ni Sen. Joker Arroyo gapu iti pannakaikalam-it ti naganna a nakibiang iti executive session ket imballaagna a mapaayaban ti reporter a nangisurat iti damag tapno ibutaktakna ti nagtaudan iti impormasion nga inlanadna iti reportna kasta met ti pannakaiwayat ti hearing tapno makita no naglabsing dagiti uppat a di nainaganan a senador iti etika iti panangilatakda iti naaramid iti executive session.

Segun ken ni Arroyo, aniaman a naaramid iti executive session, saan a rummuar iti session ket naglabsing dagiti nadakamat a senador iti etika iti panangipalgakda iti napasamak.

Ngem ita pay, impettengen ti reporter a saanna a pulos nga inaganan dagiti nagtaudan iti reportna iti pagiwarnak uray  isu ti pakadusaanna iti contempt iti Senado.

Masipsiputan ti pagtungpalan daytoy a panangpadas ti Senado a manggemgem kadagiti agiwarwarnak iti baet nga adda linteg a mangsalaknib kadakuada a mangilemmeng iti kinasiasino ti nagtaudan ti padamagda.

         (Adda tuloyna)