Susik dagiti agama masuspetsa a gapu iti pammagsol, panagbekkel

STO. DOMINGO, Ilocos Sur – Susik iti nagbaetan dagiti agama ti mapapati a puon ti pammagsol ken panagbekkel a napasamak sadiay Barangay Cabaritan ditoy nga ili idi aldaw ti Enero 6, 2017.

Maysa a Hannibal Alvin Bayani y Pere ti nangireport iti police station ti nasao nga insidente idi agarup 11:00 ti aldaw ti nadakamat a petsa.

Iti panagresponde dagiti polis, naduktalanda a nakabitin ni Byron Bayani y Pere, 41, poultry owner, iti pasanggir ti balayna nga adda tali a naiputipot iti tengngedna idinto nga iti suelo, nadigos iti dara ti anakna a ni Kyle Xavier Bayani y Tela, 14, Grade 8 iti Naglaoa-an National High School.

Nagsagrap ti barito iti bagsol iti makannigid a barukong ken iti likudna.

Idi maidanonda iti Sto Domingo Rural Health Unit indeklara ni Dr. Shaymae Pearl Ufano nga awanen ti biag dagiti agama.

Iti panagimbestiga dagiti polis, naammuan a nagriri dagiti agama gapu iti kinasukir ti anak ken sakbay ti insidente, imbaga ni Byron iti asawana nga adda iti abroad a patayenna ti anakna.

Nakarekobre ti SOCO team iti nylon a tali ken kitchen knife nga agatiddog iti 10 pulgada agraman iti pagiggaman iti nakapasamakan ti crime scene.#