Suspek iti pammagsol, innaganan ti biktima sakbay a pimmusay

CAOAYAN, Ilocos Sur – Kaso a murder ti naipila maikontra iti suspek kalpasan nga innaganan ti binagsolna sakbay a pimmusay iti nakaitarayanna nga ospital idi rabii ti Hulio 27.

Segun iti report, idi agarup alas 10:00 ti rabii ti nadakamat a petsa, bayat nga on duty ni Ramil Aquino y Tierra, 34, security guard iti NSCC building a masarakan iti Barangay Don Alejandro Quirolgico, nagpaarayat kenkuana ni Armando Tugade y Martinez, 37, baro, agpapautang iti kuarta ken nadigos iti dara manipud kadagiti sugatna, idinto nga indeklarana a binagbagsol ti maysa a Warlie Queddeng, Jr. y Serafin, 20, baro, ken residente iti Barangay Don Alejandro Quirolgico iti dayta met laeng nga ili.

Timmawag ni Aquino iti police station ket inreportna ti insidente.

Nagresponde dagiti polis ket intarayda ti biktima iti Gabriela Silang General Hospital.

Kinuna ti polis a nakapirma ti biktima iti post mortem statement a nanginagananna iti suspek sakbay a pimmusay.

Kitkitaen ti polis ti panagtakaw a motibo iti pammagsol.

Iti pannakiuman ti media iti kabsat a babai ni Tugade, kinunana a mapukpukaw ti dakkel a kantidad nga iggem daytoy sakbay a napapatay.

Mapapati a naabak ti suspek iti sugal iti dayta a rabii ket napan ken ni Tugade tapno umutang.

Nagsagrap ni Tugade iti sugat iti makannigid nga imana, dua iti makannigid a ngatuen ti barukong ken maysa iti makannigid a paset ti tianna.

Nakarekobre dagiti inbestigador iti uppat a kutsilio iti nakapasamakan iti krimen.

Naglibas ni Queddeng kalpasan ti pammagsol.

Ngem simmuko met laeng ti suspek iti kabigatanna ken ni Don Alejandro Quirolgico Barangay Captain Francis Mendoza ket ti opisial ti nangidatag kenkuana iti kapolisan.#