Suspek iti pammaltog, nabigbigen

BANTAY, Ilocos Sur – Nabigbigen ti suspek iti pannakapaltog ti drayber ti maysa a mall ket naipilaan a dagus iti kaso.

Nainaganan ti suspek a ni Jimmy Ignacio, Sr., residente iti Shelterville, San Julian Norte, Vigan City ket dagus nga impaima dagiti polis ditoy nga ili ti rekord ti kaso para iti frustrated murder maikontra kenkuana iti opisina ti provincial prosecutor, Vigan City.

Maipalagip a napaltogan idi agsapa ti Disiembre 27 ni Romel Patubo y Barit, 46, naasawaan, drayber ti JTC Mall, residente iti Barangay Baresbes, Dingras, Ilocos Norte ngem agdama nga aggigian iti Shelterville, San Julian Norte, Vigan City.

Saan a dagus a nainaganan ti suspek ngem babaen ti nainget a panagpalutpot dagiti inbestigador, nabigbig ti suspek iti pammaltog.

Saan a nailanad iti report no ania ti motibo ti pannakapaltog ni Patubo.#