Suspek iti pammaltog, natiliw dagiti polis, barangay kagawad

CANDON CITY – Saan a nakalusot iti pursuit operation ti suspek iti pammaltog saldiay Sitio Bocung, Barangay Balingaoan, ditoy siudad idi sardam ti Hunio 23.

Natiliw iti Barangay Allangigan 2nd ditoy siudad ti suspek a ni Angelito Arceo y Carasi, 35, naasawaan, ken residente iti Balingaoan ken nakumpiska iti ikutna ti pistol cal .45 Armscor a mapapati nga inaramatna a pinangpaltog ken ni Mark Ryan Carasi y Milan, 29 ken kalugaran met laeng ti suspek.

Adda itan iti kustodia ti polis ti suspek ken ti nasao a paltog nga addaan iti maysa a magasin ken tallo a bala.

Iti immun-una a report, agtugtugaw ni Carasi iti kayo a bangkito iti kusinada idi pinaltogan ti suspek iti nagsasaruno a daras.

Naitaray ti biktima iti Candon General Hospital para iti pannakaagas ti sugatna iti makannigid a luppona.

Nakasarak dagiti inbestigador iti uppat a kapsula ken dua a buli a naggapu iti cal. 45 iti nakapasamakan ti pammaltog.

Saan pay nga ammo ti motibo ti pammaltog.

Kabayatanna, napilaan metten iti kaso dagiti suspek iti pannakapapatay ni Barangay Kagawad Orlando Javier, Jr. y Canaoay idi sardam ti Hunio 14.

Napilaan iti kaso a murder ni Rodolfo Bitle Sr. ken dua a John Does ket naipaiman iti Opisina ti Provincial Prosecutor, Vigan City.

Napapatay ni Barangay Kagawad Orlando Javier, Jr. y Canaoay, 41, naasawaan, ken residente iti Barangay Parparia ditoy nga ili idi agarup 8:30 ti sardam ti Hunio 14.

Segun iti inisial nga inbestigasion, nakatugaw ni Javier iti sanguanan ti balayda ket makipatpatang ken ni Luzviminda Aquino, 41, ken Reyna Mae Aquino, 15, idi kellaat a nagparang ti suspek ket pinaltoganna ti biktima iti sumagmamano a daras a nagsagrapan daytoy kadagiti sugat iti nadumaduma a paset ti bagina a pakaibilangan ti boksit ken pribado a paset ti bagina a nakaigapuan ti dagus nga ipapatayna.#