Suspek iti pammapatay, nakasuan

BURGOS, Ilocos Sur – Nakasuan ti maysa a baro gapu iti panangpaltogna iti kalugaranna a puon ti nakatayan daytoy sadiay Barangay Cadacad idi bigat ti Octubre 6.

Naipila ti kaso a murder iti provincial prosecutor’s office maikontra ken ni Rex Abedaña y Busto, 30, baro, ken residente iti nadakamat a lugar gapu iti panangpatayna ken ni Eddie Dasalla y Dolfu, 50, nasawaan, residente met laeng iti nadakamat a barangay.

Iti panagimbestiga dagiti polis, nagsusubang iti dayta a bigat ti biktima, kaduana ti kabsatna a ni Benjamin, 57, naasawaan, retirado a kameng ti Philippine Army, ken ti suspek.

Nagturong ti suspek iti talon ngem simmurot dagiti agkabsat a mapapati a nagtagiigam.

Mapapati a nagtaray ti suspek sana inruar ti paltogna ket pinaputokanna ti sumagmamano a daras ti biktima a nagsagrapan daytoy iti sugat iti bagina.

Inaresto dagiti nagresponde a polis ti suspek ken intarayda ti biktima iti Central Ilocos Sur District Hospital ngem naideklara daytoy a dead on arrival.

Saan a narekobre ti paltog nga inusar ti suspek.#