Suspek iti pammapatay, nakasuan

SINAIT, Ilocos Sur – Nakasuan ti dua a suspek iti pannakapapatay ti maysa a tanod ken pannakasugat ti apona iti Barangay Baracbac, ditoy nga ili idi agsapa ti Pebrero 11, 2015.

Nakasuan da Seferino Villegas, Jr. @ Jun-Jun ken Reynaldo Villegas @ Aldong, agpada a residente iti nadakamat a barangay iti murder ken frustrated murder mainaig iti pannakapapatay ni Ludy Fedy Balete y Villegas, 52, barangay tanod, naasawaan, ken iti pannakasugat ti apona a ni Juliana Joy Agbayani y Balete, 6.

Naipaiman ti kaso iti opisina ti provincial prosecutor, Vigan City a nai-docket iti babaen ti NPS # 1-03-Inv-15C-00139 a napetsaan Marso 17, 2015.#