Footer

Suspek iti panagtakaw iti gasolinaan, napapatay

CABUGAO, Ilocos Sur – Napapatay iti uneg ti pagbiliaran iti Barangay Sabang idi sardam ti Agosto 29 ti maysa a baro a masuspetsa a nainbolbar iti panagtakaw iti maysa a gasolinaan ditoy nga ili.

Iti report a dimmanon iti police station ditoy, pinaltogan ti di pay nabigbig a tao ni Erwin Acedo y Robiego, a.k.a. “Akyat”, 27, baro, ken residente iti nadakamat a barangay bayat ti panagbuyana iti biliar iti Dianne’s Store and Billiard Recreation a kukua ni Jorilan Santiago y Somera idi agarup 7:55 ti rabii ti nadakamat a petsa.

Segun iti inisial a panagimbestiga dagiti nagresponde a polis, nakatugaw ti biktima nga agbuybuya iti biliar idi pinaltogan ti gun man a nagpuesto iti tawa iti likud ti pasdek a nagsagrapan ti biktima kadagiti sugat iti nadumaduma a paset ti bagina ken iti ulona.

Indeklara ti doktor nga awanen ti biag ti biktima idi maidanon iti Pira Clinic and Hospital.

Naglibas ti suspek, kuyogna ti paltogna kalpasan ti pammapatay.

Nakarekobre dagiti polis iti tallo a kapsula, maysa a buli, ken maysa a napitpit a buli a mapapati a naggapu iti cal .45.

Daytoy ti maikadua a gundaway a napaltogan ni Acedo.

Immuna a nagandat ti biagna sadiay Barangay Baclig ditoy met laeng nga ili idi Hulio 25.

Intudo ni Acedo ti kadua ni Emilio “Bobot” Somera a nangpaltog kenkuana.

Mapapati a nagsubang da Acedo ken ni Somera iti kallabes.

Ni Acedo ti maysa kadagiti suspek iti panagtakaw iti REG a gasolinaan ditoy Cabugao.

Naakusaran pay a nagtakaw iti Barangay Beddeng iti Vigan City ngem saan a dimmanon a kaso iti korte ta saan a nagdarum ti natakawan.#