Suspek iti panagtakaw, mabirbirok

VIGAN CITY – Di pay natuntonan ti masuspetsa a suspek iti panagtakaw iti Talyer de Vigan ti dati a mekaniko dagiti akinkukua.

Mapapati a napasamak ti panagtakaw idi Nobiembre 11 ngem sa la naduktalan idi malem ti Disiembre 3 dagiti akinkukua iti Talyer de Vigan a da Atty. Giovani Baquiran ken Lawrence Baquiran, agpada a residente iti No. 27 Crisologo Street, Barangay 1, Vigan City, idi napanda iti puestoda a masarakan iti Barangay Beddeng Laud, Vigan City tapno alaenda dagiti ramramitda para iti pannakaauditda.

Maysa a compressor machine nga agbalor iti P5,000.00 ken maysa a set a wrench tool nga agbalor iti P3,000.00 ti nasukalan dagiti akinkukua a mapukpukaw.

Kinuna dagiti biktima a dati a mekanikoda ti suspek a maysa a Ceferino G. Jose, naasawaan, ken residente iti No. 50 Jona Street, Freedom Park 6, Batasan Hills, Quezon City.

Ngem iti pannakaisurat daytoy, di pay natuntonan dagiti biktima no sadino ti yan ti suspek.#