Suspek iti pannakapapatay barangay kagawad, nakasuan

SINAIT, Ilocos Sur – Ibilang ti kapolisan ditoy a nasolbaren ti pannakapapatay ti maysa a barangay kagawad iti pannakaipila ti kaso maikontra iti maysa a suspek.

Iti report ti polis ditoy iti provincial police office, naipatuloden iti provincial prosecutor’s office ti kaso a murder maikontra ken ni Elmer Tubera Ibuos, suspek iti pannakapapatay ni Diomedes Rosete y Macugay, 47, naasawaan, barangay kagawad, ken residente iti Barangay Dadalaquiten, Sinait, Ilocos Sur idi agarup alas 4:10 ti agsapa ti Mayo 1.

Kagapgapu da Rosete ken ti asawana a ni Alicia Rosete y Yagin, 43, iti koronasion idi matambangda.

Segun iti inbestigasion, nakalugan dagiti agassawa iti Honda TMX a motorcycle idi naggawidda ngem bimmaba ti biktima tapno ikkatenna ti kayo a naibalangan iti dalanda ket dita metten a pinaltopaltogan dagiti armado a tattao a nagsagrapanna kadagiti sugat iti ulona ken nadumaduma a paset ti bagina.

Mapapati a cal. 9mm ti nausar, kas maibasar iti tallo a kapsula a nasarakan iti nakapasamakan ti krimen.

Naitaray ti biktima iti Corpuz Clinic and Hospital ngem indeklara ti doktor a dead on arrival.

Di pay ammo ti motibo ti pammapatay.

Kabayatanna, maysa ti natay iti pammaltog iti sanguanan ti maysa a parlor iti Barangay San Basilio, Magsingal, Ilocos Sur idi dandani alas onse ti aldaw ti Mayo 2.

Impatay ni Melecio Uniana, 55, naasawaan, ti sugatna iti tengngedna idi maidanon iti Magsingal District Hospital a nakaitarayanda ken ni Santos Romino, Jr. y Farinas, 40, naasawaan, ken residente iti Barangay Mansante, Magsingal.

Naiyalis ni Romino iti Metro Vigan Cooperative Hospital iti Bantay, Ilocos Sur tapno naan-anay a mataming dagiti sugatna iti makannawan a takiagna.

Iti panagimbestiga dagiti polis, agdaldaliasat iti national highway ti Toyota Revo a minaneho ni Romino ken nakikaluganan da Uniana ken Edwin Martinez y Alves, 50, naasawaan ken residente met laeng iti Sitio Lussoc, Barangay Mansante, Magsingal ket idi addada iti sanguanan ti Trisha Parlor a masarakan iti Barangay San Basilio, pinaputokan ida ti di nabigbig a suspek.

Mapapati a naaramat iti pammaltog ti home made shot gun (gauge 12)  kas maibasar iti lima a metallic fragments iti nakapasamakan ti krimen.

Nangisayangkaten ti PPO SOCO team iti panagimbestiga mainaig iti pammapatay.

Mapapati a riri ti pamilia ti motibo ti pammaltog.#