Suspek iti pannakapapatay ti tricycle driver, nainaganan

SINAIT, Ilocos Sur – Nainagananen ti pimmaltog iti maysa a tricycle driver sadiay Barangay Purag, ditoy nga ili idi bigat ti Septiembre 12.

Iti follow-up investigation nga insayangkatda ken babaen ti impormasion a nakalapda iti pamilia ti biktima, innaganan dagiti polis ti maysa a Ryan Yoro, residente iti Barangay Nagculluoban ditoy met laeng nga ili a suspekda iti pannakapaltog ni Rodel Inong y Igne, 35, naasawaan, ken residente iti Barangay Purag.

Segun iti polis, nangted dagiti dadakkel ti biktima a da Rogelio ken Adelina Inong iti sworn statements a mapapati a nangitudo ken ni Yoro nga isu ti nangisayangkat iti pammaltog.

Saan pay nga ammo ti motibo ti panangpaltog ni Yoro ken ni Inong.

Pimmusay ni Inong idi agarup 5:20 ti bigat ti Septiembre 12 bayat ti pannakataming dagiti sugatna iti Mariano Marcos Memorial Hospital and Medical Center, Batac City, Ilocos Norte.

Sakbayna, napaltogan ti biktima bayat ti kaaddana iti uneg ti kuartona idi agarup 1:45 ti bigat ti Septiembre 12.

Nupay kasta, nabaelan ti biktima ti nagpaarayat kadagiti dadakkelna a matmaturog iti kaabay ti kuartona ket intaray dagitoy ken dagiti nagresponde a polis iti Corpuz Clinic and Hospital para iti pannakaagas dagiti sugatna.

Naiyalis ni Inong iti MMMHMC ket ditoy ti nakatayanna sumagmamano nga oras kalpasanna.

Nakasarak dagiti inbestigador iti innem a kapsula ken 5 a deformed slugs a mapapati a naggapu iti cal .45 iti nakapasamakan ti krimen.

Nangiwayat dagiti polis iti manhunt operation maikontra ken ni Yoro iti pagtaenganna iti Barangay Nagcullooban ken dadduma pay a ninamnamada a naglemmenganna ngem saandan a nasarakan daytoy.#