Suspek iti serye ti panagtakaw iti motorsiklo, boarding houses iti Vigan City, natiliw iti Abra

VIGAN CITY – Patien ti kapolisan ditoy a natukkolda ti duri dagiti agtatakaw iti motorsiklo ken kadagiti boarding houses ditoy siudad iti pannakatiliw ti maysa a suspek sadiay Bucay, Abra ken pannakarekobre ti tallo a natakaw a motorsiklo a pakaibilangan ti lugan ti maysa nga Indian national.

Idi agarup 3:00 ti malem ti Septiembre 6, nangiwayat dagiti elemento ti Vigan City police station iti entrapment operation maikontra ken ni Eusebio Agsulod, 45, taga-Barangay Pagburnayan, Vigan City, ngem agdama nga aggigian iti Barangay Tamag, ditoy met laeng siudad sadiay Bucay, Abra, a nagtungpal iti pannakatiliw ti suspek ken pannakarekobre ti tallo a motorsiklo a mapapati a tinakawna.

Karaman ti narekobre dagiti polis ti motorsiklo a Kawasaki Rouser 180 a kukua ni Joshi Harsh Mukeshkumar, 18, baro, Indian National, ken estudiante iti University of Northern Philippines nga inreportna a natakaw iti garahe ti Ranchito Dormitory a pagkaskaseraanna idi bigat ti Septiembre 5.

Iti pannakaisurat daytoy, awan pay ti nangtunton iti dua pay a motorsiklo a mapapati a tinakaw met laeng ni Agsulod.

Patien ti kapolisan ditoy a ni Agsulod ti nagisayangkat kadagiti serye ti panagtakawan kadagiti motorsiklo ken boarding houses iti Barangay Tamag a nakabiktimaan dagiti estudiante.

Kanaig daytoy, idi agsapa ti Septiembre 6, naireport a natakawan manen ti maysa a dormitorio a masarakan iti Barangay Tamag.

Natakaw dagiti personal belongings ni Naomi Kayabala Katebe, 20, awanan asawa, Zambian national, ken Kruti Manta y Rajeshkumag, 20, awanan asawa, Indian national, agpada a medical students iti University of Northern Philippines.

Natakaw iti kuarto ni Kayabala ti maysa a laptop nga agbalor iti P22,000.00, ti bag packna a naglaon iti Samsung laptop, nga agbalor iti P30,000.00, idinto a passport, ECR card, driver’s license, voter’s ID card ken dadduma pay nga importante a dokumento ti napukaw ni Manta.

Segun iti report, napan nakituttot dagiti dua iti maikadua a kadsaaran ket idi bimmabada, dita laengen a naduktalanda a natakawanda.

Mapapati a nakalukat ti ridaw ket ditoy ti simrekan ken rimmuaran dagiti mannanakaw.

Maipalagip nga idi Septiembre 3, natakawan ti Jay-Rem Dormitory kadagiti laptop, kuarta ken selpon dagiti agkaskasera a Bishqoakama Nimesh, 23, awanan asawa; Nirajan Khamal, 21, awanan asawa; Kapair Sailesh, 22, awanan asawa; ken ni Chaudahary Shrawan, 23, awanan asawa, agpapadada amin a Nepalese ken estudiante iti University of Northern Philippines, Vigan City, Ilocos Sur.

Idi Agosto 18, natakawan ti Soberano Dormitory a masarakan met laeng iti Barangay Tamag a nakakurimesan ti laptop, kuarta, selpon ken dadduma pay a gamit dagiti estudiante nga agpapada a taga-upland municipalities ken estudiante met laeng iti UNP.#