Suspek a nangpatay iti barangay captain, 2 pay nagudas

NARVACAN, Ilocos Sur – Tallo a lalaki a pakairamanan ti suspek iti pammapatay met laeng ti ginudas ti armado a tao bayat ti pannanganda iti noodles iti tiandaan publiko ditoy nga ili idi rabii ti Abril 24.

Kitkitaen dagiti inbestigador ti anggulo nga adda pakainaigan ti nasao a pammaltog iti pannakapapatay ti maysa a barangay captain idi napan a bulan.

Innaganan dagiti polis dagiti biktima a da Albino Floria y Pacubat, 50, naasawaan, partidor, residente iti Sta. Lucia; Deo Taiza y Javier, 33, naasawaan, residente iti Sta. Jose ken Dionisio Rabang y Rabboon, 53, naasawaan, ken residente iti Quinarayan, agpapada a barangay ditoy nga ili.

Iti inisial nga inbestigasion ti polis, mangmangan iti noodles dagiti biktima iti maysa a food stall idi maysa a suspek ti kellaat a nagparang sana pinaltopaltogan dagiti biktima iti sumagmamano a daras a nagsagrapanda iti sugat iti nadumaduma a paset ti bagida.

Naitaray dagiti biktima iti Central Ilocos Sur District Hospital ngem naideklara ni Taiza a dead on arrival. Naiyalis ni Floria iti Saint James Hospital, Vigan City ken ni Rabang iti Metro Vigan Cooperative Hospital, Bantay ngem pimmusayda bayat ti pannakataming ti sugatda.

Naglibas ti di nabigbig a suspek iti saan nga ammo a direksion, kuyogna ti armasna.

Nangisayangkat iti hot pursuit operation dagiti polis nga indauluan ni Chief Inspector Rex Buyucan, COP, ken pinakaammuanda ti Provincial Tactical Operation Center para iti pannakaipasdek ti dragnet operation kadagiti kabangibang a police stations ngem negatibo ti resultada.

Nakasarak dagiti inbestigado iti crime scene ti 3 a kapsula ti di ammo ti kalibrena a paltog, 3 a buli, maysa a deformed slug, maysa hi-cap magazine nga addaan iti 13 a bala para cal. 45, maysa a pakete ti Malboro lift-top nga addaan iti 7 nga stick ti sigarilio, ken maysa a transparent plastic sachet a naglaon iti mapapati a shabu.

Kitkitaen dagiti polis ti anggulo nga adda pakainaigan daytoy a pammapatay iti pannakapapatay ni Nalvo Barangay Captain Melchor Alcantara y Sembrano, 51 idi Marso 28.

Agdaldaliasat ti Adventure a lugan ni Alcantara iti national highway a sakup ti Barangay San Antonio, Narvacan idi agarup 8:40 ti rabii ti nadakamat a petsa idi inabay ti motorsiklo a nagluganan dagiti suspek ket maysa kadakuada ti nangpaltog iti sumagmamano a daras iti biktima.

Naitaray iti Central Ilocos Sur District Hospital ni Alcantara ngem naideklara a dead on arrival.

Nakarekobre dagiti inbestigador iti nakapasamakan ti krimen iti maysa a kapsula a mapapati a nagtaud iti calibre .45.
Iti follow-up investigation dagiti polis, nabigbig ti nagmaneho iti lugan dagiti pimmatay iti barangay captain a ni Albino Floria y Pacubas, residente iti Sta. Lucia, Ilocos Sur.

Napilaan ni Floria iti kaso a murder, kaduana iti maysa a John Doe iti opisina ti provincial prosecutor.

Dua nga anggulo ti kitkitaen dagiti inbestigador iti pannakapapatay ti barangay captain ti Nalvo: ti saan a nalpas a konstruksion ti P8-million a balay ken iti mapapati a panang-facilitate ni Alcantara iti pannakapasardeng ti operasion ti maysa a drug personality iti Santa Maria.#