Suspek pannakapapatay polis, 2 kaduana, nakasuan

BANTAY, Ilocos Sur – Nakasuan iti murder iti opisina ti provincial prosecutor, Vigan City dagiti suspek iti pannakapapatay ni PO1 Reynaldo Daciego y Lames, 33, PNP member iti Salcedo police station idi rabii ti Oktubre 23.

Segun iti progress report manipud iti SITG Daciego, nabigbigen dagiti suspek a da Romando Eduarte y Reyes, taga-Poblacion, Lacub, Abra ken dua a John Doe ket nakasuanen dagitoy iti murder.

Nai-docket ti kaso iti babaen ti NPS No. I-03-INV-15-00584.

Maipalagip a napapatay ni Daciego bayat ti pannakilamayna iti maudi a rabii ti ulitegna sadiay Sitio Masilag, Barangay Poblacion Norte, Salcedo, Ilocos Sur.#