Suspension ti Motorcycle Doble-Plaka Law

NAKASAYSAYANG dagiti nabusbos a pondo ken panawen iti pannakaaramid ti Motorcycle Crime Prevention Act wenno Republic Act No. 11235 ta kalpasan laeng ti panangaprobar ni Presidente Rodrigo Duterte, ken panagbalinna a linteg, ket dagus a nasuspende ti implementasionna. 

Sinuspende ni Presidente Duterte, maysa a motorcycle enthusiast, ti implementasion ti R.A. 11235 gapu ta rinibribu a motorcycle riders iti nagduduma a paset ti Pilipinas dagiti nagprotesta iti pannakaipakat ti linteg a mangimanmandar ti kaadda iti dakdakkel a plate number wenno plaka iti sango ken likud ti motorsiklo a mabasa iti 15 a metro a kaadayo a distansia tapno malapdan dagiti krimen nga isaysayangkat dagiti nakalugan iti motorsiklo. Agbalin metten a daddakkel dagiti color-coded a plaka segun iti rehion a nakarehistruan ti motorsiklo.

Naipalaon iti linteg a ti matiliwan nga agmanmaneho iti motorsiklo nga awanan iti baro a plaka ket madusa iti prision correccional (innem a bulan ken maysa nga aldaw agingga iti innem a tawen) kas nailanad iti Revised Penal Code wenno agmulta iti saan a nababbaba ngem P50,000 ken saan a nasursurok ngem P100,000 wenno agpada. Sabali met ti dusa dagiti akinkukua ti motorsiklo ken nakalugan no mainaig iti pannakapasamak ti krimen.

Adu a motorcycle riders ti mamati a sinuspender ni Presidente Duterte ti implementasion ti R.A. 11235 gapu iti kaadu dagiti nagprotesta ket no saanda a mapagustuan ti kiddawda ket amangan no ipariknada ti rurodda iti masungad a May 13, 2019 National and Local Elections babaen iti saanda a panangibotos kadagiti kandidato ti administrasion.

Prinotestaan dagiti motorcycle riders ti baro a linteg gapu ti dakes nga epekto ti dakdakkel a metal a plaka iti sango ti motorsiklo iti aerodynamics a mabalin a maikkat no subaen ti angin ken napaspas ti taray ti motorsiklo ket makaigapu iti aksidente. Impettengda a saan a makatubeng iti krimen ti baro a linteg ta dagiti kriminal ket saanda nga usaren dagiti bukodda a rehistrado a motorsiklo no agisayangkatda iti krimen.

Natibker ti pagtaktakderan ni Senador Richard Gordon, principal author ti R.A. No. 11235, a nasken ti pannakaipatungpal ti linteg tapno malapdan dagiti adu a pammapatay nga isaysayangkat dagiti riding-in-tandem, ken dadduma pay a krimen a pakaus-usaran ti motorsiklo.   

Segun ken ni Senador Gordon, nagbalinen dagiti motorsiklo a “crime machines” kas instrumento ti pannakaisayangkat dagiti adu a krimen iti Pilipinas.

Maibasar iti estatistika ti Philippine National Police, dumanon iti uppat ti average dagiti mapappapatay iti inaldaw babaen kadagiti riding-in-tandem a nakalugan iti motorsiklo. Agdagup iti 28,409 a motorcycle crimes dagiti napasamak manipud 2010 agingga idi 2017, ket 46% wenno 13,062 ket shooting incidents. Iti kadagupan dagiti nasurok a 4,000 a motorcycle riding crimes idi 2016, ket walo a kaso laeng dagiti nasolbar.

Ti pannakaaprobar ken dagus a suspension ti R.A. 11235 ket ipaneknekna ti kinaawan ti naan-anay a naisayangkat a konsultasion kadagiti maseknan nangruna kadagiti motorcycle riders ta saanda koman a prinotestaan ti baro a linteg no nakonsulta ken nasolusionan dagiti pakaseknanda.

Pudno a maar-aramat dagiti motorsiklo kadagiti nagduduma a krimen ta daytoy a lugan ti kapartakan ken kasayaatan a behikulo iti aniaman a kasasaad iti dalan a napartak a wagas ti panagisayangkat iti krimen. Pudno met a dagiti agisayangkat iti krimen ket saanda nga aramaten ti bukodda a motorsiklo a nakarehistro iti Land Transportation Office kas kadagiti mapaspasamak a krimen nga isaysayangkat dagiti nakalugan kadagiti motorized vehicles a kaaduanna ket dagiti tinakawan a lugan wenno plaka dagiti usarenda no agaramidda iti krimen. 

Saan a tumutop nga adda dakkel a plaka iti sango ti motorsiklo kas ipaneknek ti international safety standard dagiti agar-aramid wenno manufacturer ti motorsiklo iti nagduduma a pagilian ta dayta ket napeggad no napartak ti panagtaray ti motorsiklo a mabalin a pakaigapuan iti aksidente ken trahedia. Ipaneknek dayta ti pannakadisenio dagiti motorsiklo nga awanan iti pagikabitan iti plate number iti sangona. Nasaysayaat koma nga adda dakkel nga sticker ti numero ti motorsiklo iti agsumbangir a bakrangna.  Ngem uray no agsusumbangir ti pagyanan ti plate number dagiti motorsiklo no saan nga agridam dagiti pannakabagi ti linteg nangruna dagiti kameng ti PNP, awanto met laeng ti mamaayna.

Iti agdama, nakaad-adu dagiti maisaysayangkat a checkpoints a kaaduanna a masitsitar ket dagiti nakamotorsiko, ngem nagadu met latta dagiti mapaspasamak a krimen nga isaysayangkat dagiti nakalugan iti motorsiklo. Kaipapananna dayta a saan nga epektibo ti gapuanan dagiti ag-checkpoint ta saanda a malapdan dagiti krimen nga isaysayangkat dagiti nakamotorsiklo.

Ti Pilipinas, kas pagilian dagiti adu a napanglaw, nagbalinen ti motorsiklo a kangrunaan a demotor a behikulo ti panagbiahe. Gapu iti nalaklaka a presio dagiti motorsiklo ken magasto iti pannakamantinerna ket nagbalinen daytoy a paset ti panagbiag dagiti adu a Pilipino iti panagbiaheda. Ikarigatan dagiti napanglaw ti mangiremedio iti downpayment ken pagtinnagda tapno makagatangda iti motorsiklo.

Adu dagiti marurod a motorcycle riders a nakagatang iti motorsiklo idi 2015 agingga iti agdama ta saan pay nga inwaras ti LTO dagiti plate number, ngem addan baro a linteg a mangbaliw ti plaka dagiti motorsiklo.  

Kitaen koma a nasayaat dagiti kameng ti Kongreso no maitutop dagiti putarenda a linteg pakaseknan dagiti agtagikua ken agluglugan iti motorsiklo. Pagdaksanna kaaduan kadagiti kongresista ken senador ket kanayonda a nakaluganda kadagiti luxury car ket saanda a marikna ti sagsagrapen dagiti ordinario a Pilipino a kakaasi a nangiremedio iti igatangda iti motorsiklo.