Footer

Suspetsa iti 3 pammapatay, nabigbig, nakasuan

VIGAN CITY – Naipaiman iti provincial prosecutor’s office ditoy dagiti dua a kaso ti nagsina a pammapatay iti Burgos ken Banayoyo kalpasan ti pannakabigbig dagiti mapapati a nagisayangkat kadagiti nasao a krimen.

Nainagan ni George Ganaben a kangrunaan a suspetsa iti pannakapapatay ni Hector Dato, 48, naasawaan, incumbent barangay kagawad ti Manaboc, Burgos, Ilocos Sur  iti rabii ti Nob. 8; idinto a nabigbig da  Rommel Gamata, 27, baro, ken Fernando Gallardo, agpada a residente iti Lintik, Banayoyo a mapapati a nangbagsol ken ni Alejandro de Gracia, 44, naasawaan, aglaklako iti balut, ken residente iti Angkiling, Sta. Lucia, Ilocos Sur.

Napaltogan ni Dato bayat ti kaaddana iti kasangay ti maysa a kalugaranda a nakatayanna a sigida.

Sabali pay a kalugaranda, maysa a Remedios Cabangcala, ti nasugatan gapu iti nayaw-awan a bala.

Iti sabali a bangir, nasarakan ti bangkay ni de Gracia itay Nob. 17 iti igid ti kalsada iti Sitio Apdo, Barangay Lintik, Banayoyo a nagsagrap iti bagsol iti makannawan nga abagana ken barukongna a mapapati a dagus nga impatayna.

Nakarekobre dagiti polis iti asideg ti nakapasamakan ti krimen iti maysa a XRM a motorsiklo, nangisit a wallet a naglaon iti lisensia  ken P600.

Inareston dagiti polis ni Gamata ket madama ti panangbirbirokda ken ni Gallardo.

Ibilangen dagiti polis a nasolbaren dagiti dua a kaso ti pammapatay iti pannakabigbig dagiti suspetsa.#