Suspetsa iti pammaltog iti agama, naisuko

VIGAN CITY – Addan iti ikut ti polis ditoy ti suspetsa iti pannakapaltog iti agama iti Barangay Amianance ditoy.

Insuko ni Barangay Captain, Mario Tadeja ti Pussuac, Sto. Domingo, Ilocos Sur ni Rudy Alcid iti kuerpo ti polis iti Sto. Domingo.

Ni Alcid ti suspetsa iti pannakapaltog ni Hipolito Alcid, 44, ken ti anakna a ni Mark Clinton, 12, idi parbangon ti Abril 21.

Nupay nakalasaten ni Hipolito Alcid kalpasan ti pannakaoperarna, adda pay la iti intensive care unit ti Metro Vigan Cooperative Hospital. Ditoy met laeng nga ospital ti nakaitarayan ti anakna.

Segun iti inbestigasion, rimmuar dagiti agama gapu iti panagprobokar ti suspetsa ngem pinaltogan daytoy dagiti biktima.

Impila dagiti polis ti kaso a double frustrated murder maikontra ken ni Rudy Alcid.#