Swindling suspect, naaresto iti uneg ti bus sadiay Bacnotan,

STA. CRUZ, Ilocos Sur – Gapu iti nadaras a panagtignay dagiti polis ditoy nga ili, napengdan ti panagbiahe ti bus a nagluganan ti suspek a nangloko iti tindera a nagtungpal iti pannakatiliw daytoy sadiay Bacnotan, La Union.

Idi arestaren dagiti polis, saan a nakapaglibak ni Elmer Sambrano y Cuales, 32, awanan asawa, ken residente iti No. 6 Callejon Street, Barangay Maybunga, Pasig City, kalpasan a binigbig ni Arnold Bautista Jallorina, tricycle driver, nga isu ti inkargana iti asideg ti Durong Bakery a nagpaitulod sadiay Barangay Casilagan, ditoy met laeng nga ili, ken limmugan iti Partas Bus nga agpaabagatan.

Sakbayna, biniktima ni Sambrano ni Ma. Sheryl Yting y Pactol, 23, naasawaan, residente iti Barangay Nangalisan, Sta. Lucia, Ilocos Sur, saleslady iti Durong Bakery a masarakan iti igid ti national highway a sakup ti Barangay Poblacion Este, Sta. Cruz babaen ti panagpammarangna a kayong ti akinkukua iti bakery a pagpapaayan ni Yting.

Segun iti tindera, idi agarup 4:50 ti malem ti Septiembre 9, simrek lattan ni Sambrano iti tienda ket inyam-ammona ti bagina a brother in law ni Eleno Samson, akinkukua iti Durong Bakery.

Mapapati a ginayyem ni Sambrano ti tindera agingga iti sinublatna ti selpon daytoy tapno tawaganna ti sekretaria ni Samson.

Saan a nasiputan ni Yting a sinuktan ni Sambrano ti numero ti sekretaria a nakakabil iti phonebook iti numero ti kumplotna ket daytoy ti nagtext iti tindera nga ikkanna ti suspek iti P3,500.00.

Idi naiyawat ni Yting ti kuarta, dagus a pimmanaw ni Sambrano ket limmugan iti traysikel a minaneho ni Bautista sa nagpaitulod iti Barangay Casilagan, Sta. Cruz sa limmugan iti Partas Bus nga agpaabagatan.

Apaman a naawat ti kapolisan ditoy ti swindling incident, nangiwayatda a dagus iti hot pursuit operation ken nakikoordinarda kadagiti police stations manipud Tagudin agingga iti La Union para iti pannakalapped ti bus a nagluganan ti suspek.

Alas 6:30 ti malem iti dayta met la a petsa a nakaawat iti tawag ti polis-Sta. Cruz babaen ken ni Chief of Police Police Senior Inspector Fredilex Alarcon Marron a pinasardengda ti nadakamat a bus iti Bacnotan, La Union.

Positibo nga intudo ti tricycle driver ni Sambrano nga isu ti pasaherona manipud iti asideg ti Durong Bakery agingga iti Barangay Casilagan a limmugananna iti Partas Bus nga agpaabagatan.#