Swiss national, naaresto

CANDON CITY – Inaresto dagiti polis ditoy siudad ti maysa a Swiss national gapu iti kasona iti maysa a korte sadiay San Fernando City idi Septiembre 26.

Inaresto dagiti polis-Candon ni Josef Wyrsch y Franz, 62, naasawaan, natibo iti Switzerland ken agdama a residente iti Barangay Darapidap, Candon City babaen ti bileg ti warrant of arrest nga inyisio ni Judge Victor O. Concepcion ti Regional Trial Court 30, San Fernando City.

Sumangsango ni Wyrsch iti kaso a panaglabsing iti RA 9262 a naipababaen iti Criminal Case No. 10521 ket nairekomenda nga agpiansa iti P40,000.00 para iti temporario a wayawayana.

Nagballigi dagiti polis a nangaresto ken ni Wyrsch babaen ti impormasion a naggapu manipud iti maysa a kameng ti barangay intelligence network a nangitip iti isasangpet ti akusado iti balayna iti nadakamat a barangay.

Naikustodia ti akusado iti Candon police station.#