Synchronized barangay assembly, naangay

CANDON CITY – Nakipagpaset dagiti barbarangay iti pannakaisayangkat ti synchronized barangay assembly ditoy siudad idi Oktubre 14, daytoy ti naammuan ken ni Andres Vendiola, DILG officer.

Kinuna ni Vendiola a maisaysayangkat ti barangay assembly iti kada Marso ken Oktubre iti tinawen ket ditoy nga ireport dagiti barangay officials dagiti nagapuananda iti umuna a semestre ti tawen, report mainaig iti pinansial ken dagiti agdama a programa ken proyekto kas iti disaster preparedness, solid waste management ken urnos ken talna iti barangay.

Kinuna ni Vendiola a babaen ti nasao nga asemblia, maipeksa ken maiyarungaing dagiti bumarangay dagiti reklamo ken kasapulanda a programa manipud iti barangay.

Agdagup iti 42 dagiti barangay ditoy siudad. (Danny Antalan)