Synchronized barangay assembly, naangay

VIGAN CITY – Naisayangkat ti synchronized barangay assembly kadagiti nadumaduma a barangay iti pagilian itay Oktubre 12 kas panagtungpal iti paglintegan.

 

Kinuna ti maysa a DILG official a maikadua a semestre daytoy naangay a barangay assembly iti daytoy a tawen.

Mamindua iti makatawen a maisayangkat ti asemblia iti barangay pakaibaskagan dagiti nagapuanan dagiti opisial ti barangay, ti pinansial nga estado ti barangay, no mano ti pondo ken no sadino ti nakaigastuan dagitoy.

Natratar pay bayat ti assemblea dagiti dadduma pay a pakaseknan  ti barangay  kas iti disaster preparedness, solid waste management ken pannakatagiben ti urnos ken talna.

Inggunamgunam pay ti nasao nga opisial ti pannakaipaskin wenno full disclosure dagiti dokumento dagiti agtuturay iti barangay tapno nalawag a makita dagiti residente no husto met la ti pannakagasto dagiti pondo.#