Tabako ti kangrunaan pay laeng a pagbiagan dagiti mannalon iti Candon City

CANDON CITY.  Ngimmato ti produksion ken immadu ti bilang dagiti mannalon nga nagmula ti tabako a birhinia ken native itoy a tawen iti Candon sub-area a kadakkelan nga agmulmula ti tabako iti Pilipinas.

Daytoy ti maibasar iti comparative data report iti dua a tawen a naala manipud iti National Tobacco Administration—Candon Area partikular iti interview ken ni Estrella de Peralta, branch manager iti Candon City area.

Kinuna ni De Peralta nga ad-adu pay laeng ti nagmula iti tabako itoy a season, maikumpara iti napalabas a tawen, kayatna a sawen, ngimmato met ti produksion ti birhinia ken native a tabako.

Itoy a tawen, immabut iti 20 a milion a kilos ti estimated a production ti tabako maikumpara iti 19 a milion itay napalabas a season, wenno nangatnato iti agarup 5 a porsiento.

Itoy a tawen, ngimmato ti produksion ti tabako a Birhinia iti 3 a porsiento manipud iti 9,790  a namulaan nga ektaria, nalawlawa ngem idi napalabas a season nga agdagup laeng iti 9,438 nga ektaria ti namulaan.  Dimmakkel met ti produksion ti native tobacco ta namulaan ti 1,069 nga ektaria itoy a tawen maikumpara iti 837 nga ektaria itay napalabas a season wenno nangatngato iti 27 a porsiento.

Ngimmato met ti bilang dagiti mannalon a nagmula ita a tawen iti 12,595 manipud iti 11,594 a mannalon a nagmula idi napalabas a tawen.  Iti pabuklanna, aglawa iti 10,859 nga ektaria ti namulaan iti tabako, ngimmato iti 584 nga ektaria manipud iti 10,275 ektaria idi napalabas a tawen.

Ti Candon Area ti kadakkelan pay laeng ti produksion ti tabako iti pagilian a Pilipinas.  Ti Candon City ti kangatuan ti maaw-awat iti excise tax ti tabako gapu isu ti kadakkelan ti produksion ti tabako iti amin nga ili