Taga-Candon City ti Gawad Saka Awardee ita a tawen

CANDON CITY – Maysa a residente iti Villarica ditoy ti  Gawad Saka Awardee  iti coconut farming ita a tawen.

Mismo a ni Presidente Gloria Macapagal-Arroyo ti nangiyawat iti plake ti pammadayaw ken ni Jose Pajarillo idiay Malakaniang itay Hulio 13 gapu iti dakkel a napastrekna iti coconut farming.

“Tinagtagainepko daytoy a pammadayaw… kasla diak pay la mamati a makapanak idiay Malakaniang ken makasangok ni Presidente Arroyo gapu iti kinamannalonko,” kinuna ni Pajarillo.

Da Mayor Allen Singson, ti asawana a ni Freda Luz Singson, ni dati a Mayor Grace Singson, ti asawana a ni Carolina, ken ti anakna a ni Teresa dagiti nangkuyog ken ni Pajarillo idi awatenna ti pammadayawna iti Malakaniang.

Kinuna ni Pajarillo a dinamag ni Pres. Arroyo idi kasangonan: “Adu aya ti nyog iti Candon?”

Kinunana a sinungbatanna iti “Wen, Ma’am, adu ti nyogmi.”

Sakbay daytoy a pammadayaw ni Pajarillo wenno Tang Joe a kas awag kenkuana, naminduan a daras a nangabak iti regional award malaksid laeng kadagiti pammadayaw a nagun-odna iti provincial level.

Dua nga ektaria ti kanioganna a namulaan iti hybrid a niog idinto a kaguddua nga ektaria ti namulaan iti native a niog.  Nabaetan dagiti nyog iti guimaras mango ken dadduma pay nga agbunga a kaykayo.

Umab-abot iti P300,000 ti ganansiana iti tinawen manipud iti daytoy a plantasionna.

 Kinuna ni Pajarillo a nangrugi a nagmula iti nyog idi 1977 kalpasan a naguyugoy ti Philippine Coconut Authority a mapagbalin ti dagana a pilot project  kas nyogan.  

Kinuna ni Tang Joe nga idi damo, adda panagduaduana  ngem intuloyna idi impasingked ti abogado a gayyemna a napintas a proyekto ti panagmula iti nyog.

Daytoyen ti nagbalin a pamastrekanna manipud idi.