Taga-Caoayan ti kampeon iti Singing Idol Season II

VIGAN CITY. – Balasang a tubo ti Caoayan, Ilocos Sur ti nagkampeon iti Ilocandia Singing Idol Season II finals a naisayangkat iti Vigan Gymnasium itay Mayo 6, 2009.

Gapu iti panagkampeonna, inyawid ni Jenny Jane Aguiner ti P100,000 a premio ken  scholarship grant ti Ryan Cayabyab School of Music.

“Maragsakannak iti balligi ti Ilocandia Singing Idol.  Definitely, addanto manen  Season III ket napimpintasto pay ti mabuya dagiti kaprobinsiaan,” kinuna ni Bokal Zuriel Zaragoza, nangiwayat iti talent search a naisayangkat iti dua a bulan.

Dagiti dadduma a nangabak: Vanessa Absing iti Santo Domingo, Ilocos Sur, maikadua,  (P60,000); Jolethe Bueno, maikatlo,   (P40,000);  ni Kenley Filarca iti Magsingal, maikapat;  ken ti Frances Gia Gazmen iti Narvacan, maikalima.#