Taga-Ilocos Sur, nagkampeon iti Milo Marathon

LAOAG CITY –  Dua a tumataray manipud iti Ilocos Sur ti nangabak iti  Milo Marathon, Laoag City leg a naangay ditoy idi Hulio 3.

Iti 10-kilometer race, imbalat ni Arthur Garidan manipud iti Candon City, Ilocos Sur dagiti kinasalipna babaen ti orasna a 33 a minutos.

Iti 21-kilometer race, maikadua a puesto ti nagun-od ni Jay Viloria ti Lidlidda, Ilocos Sur.

Sumagmamano kadagiti dadduma pay a lumulumba a taga-Ilocos Sur ti nagpuesto iti top ten iti 3-K ken 5-K run.

Kabayatanna, indauluan ni Leoncio Balbin, Jr., agdama nga information officer ti grupo manipud iti Candon City a  timmaray iti 21-K run.

Karaman kadagiti nakipaset iti palumba dagiti kameng ti media a pakaibilangan da Arlon Serdenia, station manager ti DZTP, ken ni Danny Antalan, reporter ti DZTP,  Freddie Lazaro ti PIA-Vigan, Lito Javier ti Bombo Radyo, Joey Culabat ti FM ken dadduma pay.

Naiwaras pay ti libre a sapatos kadagiti 500 a tumataray nga ubbing iti probinsia ti Ilocos Norte.#