Footer

Taga-Urdaneta City ti Most Outstanding Magsasaka Syentista 2008

BATAC CITY – Taga-Urdaneta City, Pangasinan ti napili a most outstanding magsasaka syentista ita a tawen.

Inawat ni Pablo Abocado ti gunggonana a kuarta ken tropeo bayat ti maika-20 a Regional Symposium on Research and Development Highlights  ti Ilocos Agriculture and Resources Research and Development Consortium (ILARRDEC) a naangay iti Mariano Marcos State University ditoy nga ili idi Agosto 12.

Napili ni Abocado gapu iti panagusarna iti organiko nga abono ken pestisidio iti panagtalonna. Segun ken ni Abocado, inrugina ti agusar iti organiko a panagtalon idi 1998 kalpasan a napaliiwna a bassit ti maganarna iti panagusarna iti komersial nga abono.

Kinuna ni Abocado nga idi agar-aramat iti komersial nga abono, kangatuanen ti 80 a kaban a maapitna iti kada ektaria a mulaanna iti pagay, ngem idi nagusar iti organiko nga abono ken pestisidio, immabut iti 90-110 a sako ti apitenna idinto a basbassit pay ti magastona.

Kadua ni Abocado a napadayawan da Nestor Acosta (Bacarra, Ilocos Norte), 1st runner up ken Maximo Rabanal (Vigan City), 2nd runner up.

Inyalat met ti Batac FITS Center ti pammadayaw a Best Techno Pinoy Center idinto a maikadua ken maikatlo a puesto ti Ayusan Norte (Vigan) FITS Center ken Urdaneta FITS Center kas panagsaganadda.

Iti panagsarita ni Gov. DV Savellano iti opening program ti symposium,  kinunana a mayannatup a pagpatangan iti daytoy a panawen ti krisis dagiti isyo ti makan ken enerhia  saan laeng a para ita no di pay kadagiti sumarsaruno a henerasion.

“Nagasattayo ditoy Rehion I ta nabaknang pay laeng ti nakaparsuaantayo. Ngem agbalin koma a karit kadakayo nga agsuksukisok no kasano a masalaknibantayo dagitoy iti laksid ti agtultuloy a modernisasion,” kinuna ti gobernador.

Kinuna met ni Batac City Mayor Jeffrey Nalupta a nagasat ti Rehion Uno ta addaan daytoy iti adu a nalalaing nga agsuksukisok.

Innayonna a saan laeng a pakaseknan ti rehion ti panagkurang  ken ingingina ti makan ken enerhia no di ti sibubukel a pagilian.

“Mangnamnamaak a makatulong dagiti amin a maipresentar a produkto ti panagsukisok itoy a symposium tapno maikkan iti solusion ti malnutrision a lalo a marikrikna dagiti napanglaw a pamilia,” innayon ni Nalupta.

Dagiti sumaganad dagiti agdama a kameng ti ILARRDEC: Mariano Marcos State University (MMSU), Don Mariano Marcos Memorial State University (DMMMSU), Pangasinan State University (PSU), University of Northern Philippines (UNP), Ilocos Sur Polytechnic State College (ISPSC), Union Christian College of Northern Development Organization for Rural Action (UCC-CONDORA); Department of Agriculture (DA)-1, National Tobacco Administration, CODA, Philippine Carabao Center (PCC), Bureau of Agricultural Research (BAR), Department of Environment and Natural Resources (DENR)-1, Ecosystems Research and Development Bureau (ERDB), Department of Science and Technology (DOST)-1, PCARRD, National Economic and Development Authority (NEDA), ken Philippine Rice Research Institute (PhilRice),  Batac, Ilocos Norte.

Ti tema ita a tawen:  Harnessing RDE for Food Security and Bio-energy.#