Tagilako a karne, nanginngina iti Sinait ngem Cabugao

SINAIT, Ilocos Sur – Nanginngina ti presio ti karne ti baboy a mailaklako iti tiendaan publiko ditoy nga ili ngem iti Cabugao, segun iti report manipud iti market supervisor iti sangguniang bayan itay nabiit.

Iti panagreport ni Market Supervisor Joel Ibe iti sangguniang bayan, impalgakna a nanginngina ti presio ti mailaklako a karne ti baboy iti public market ti Sinait no maikompara iti presio ti karne ti baboy a mailaklako iti kaparanget nga ili ti Cabugao gapu iti kaawan ti price control ditoy nga ili.

Pinaayaban ti sangguniang bayan ni Ibe gapu iti panagreklamo dagiti consumers iti kinangina ti presio ti baboy ditoy nga ili.

Segun ken ni Ibe, mailaklako ti karne ti baboy iti Sinait iti P180 kada kilo idinto a P170 laeng iti Cabugao, nupay maymaysa met ti agparparti iti mailako a karne ti baboy kadagitoy dua nga ili.

Mailaklako met ti karne ti manok iti Sinait iti P150 kada kilo idinto a P130 laeng iti Cabugao.

Ngem kinuna ni Ibe a ti kaawan ti price control ti makagapu iti kinangina iti presio ti karne a mailaklako iti tiendaan gapu ta awan ti makaiparit kadagiti partidor a mangipangato iti tagilakoda.

Kabayatanna, inwaragawag ti sangguniang bayan ti San Juan a saan a ngimmato ti presio ti karne ti baboy a mailaklako iti tiendaan publiko.

Inwaragawag ti SB a nagtalinaed ti presio ti karne ti baboy iti P170 iti sanguanan ti reklamo dagiti aggatgatang nga adda dagiti aglaklako kadagiti barangay iti P200 kada kilo.

Iti report a dimmanon iti sangguniang bayan, angkaten dagiti tindera nga agipasiar iti lakoda kadagiti barangay iti P185 kada kilo nga ilakoda met iti P200 kadagiti barangay.

Impatalged ti SB nga agtalinaed ti P170 a presio daytoy a tagilako iti tiendaan.#