VIGAN CITY – Inagaw dagiti sangsangili dagiti kangrunaan a gunggona iti naangay a pasalip ti streetdancing ti Langgonisa Festival ditoy itay Enero 22.

Inyalat ti LGU Tagudin ti umuna a gunggona iti Open Category idinto a nagun-od ti San Nicolas High School ti first prize iti High School Category ti nasao a pasalip.

Mapattapatta a nasurok a 30,000 a tattao ti nagdudupudop iti kalsada ditoy siudad tapno imatanganda daytoy a pasalip a nagbalinen a tourist attraction iti panangrambak daytoy a siudad iti maikanem nga anibersariona iti panagbalinna a siudad.

Iti panangiyalatda iti umuna a gunggona, immawat ti Tagudin ken San Nicolas High School iti P50,000 a premio.

Imbalat met ti Pantay Elementary School dagiti pagadalan iti elementaria a kinabalubalna ket inyawidna ti P30,000 a gunggona.

Dagiti sumaganad ti resulta ti streetdancing competition:

Elementary (Category A) – Pantay Elem. School, P30,000); Raois Elem. School, P20,000; ken Bulala Elem. School, P10,000.

High School (Category B) – San Nicolas High School, P50,000; University of Northern Philippines, P30,000; Vigan National High Schoool East, P10,000’ Vigan National High School West ken Ilocos Sur National High School, consolation prizes.

Open (Category C) – LGU Tagudin, P50,000; LGU San Nicolas, P30,000; Cabugao Cultural Troupe, P10,000; Ilocos Sur Polytechnic State College, Sta. Maria, consolation prize, P5,000.

Immawat amin a partisipante iti plake ti pammigbig.

Nagbatayan dagiti hurado: street dancing, 50%; ken dance showdown, 50%.