Footer

Taiwan, makikammayet iti Ilocos Sur iti agrikulltura

SAN JUAN, Ilocos Sur -Impakaammo ti maysa nga opisial ti ahensia ti ekonomia ken kultura ditoy pagilian a madadaan ti pagilianna a makitinnulong iti pagsayaatan ti Ilocos Sur bayat ti ibibisitana iti BaRang-ay Demofarm idi Disiembre 1.

Iti eksklusibo nga interview ti NBN Vigan ken ni Donald C. T. Lee, dadaulo ti Taiwan Economic and Cultural Office in the Philippines,  kinunana a kangrunaan a mabalin a pakikammayetan ti Taiwan iti Pilipinas ti benneg agrikultura.

Segun ken ni Lee, nagpatangdan ken ni Gob. Deogracias Savellano tapno maaddaan iti “link’ ti Taiwan ken Ilocos Sur ken ti pannakapaadda ti maysa a contact person tapno isu ti kakinnontak ti opisinana para iti mabalinda nga itulong.

Innayonna a nakasaritana metten ni House Deputy Speaker Eric Singson para iti panaggatang ti Taiwan iti produkto ti agrikultura ti Ilocos Sur kangrunaan ti mais.

Kinuna pay ni Lee a kitkitaenda pay ti posible a panaggatangda iti darat manipud ditoy probinsia kas pangrugian ti pannakaiyestablisar ti “linkage” iti benneg ti panagtagilako ken komersio.

Kabayatanna, babaen ti maysa a resolusion nga impasa ti Sangguniang Panlunsod ti Candon City, naideklara kas adopted son ti siudad ni Lee. Naiyawat ti kopia ti resolusion bayat ti musical concert iti simbaan ti Candon City idi Nobiembre 30.#