VIGAN CITY – Adda  dagiti takong a maparparti ditoy siudad a masuspetsa a naipuslit manipud sabsabali a probinsia ket mabaybay-an manen dagiti patanor  a baboy ditoy probinsia.

Kinuna ni Arnulfo Quitoriano, slaughterhouse master ditoy siudad, nga adda dagiti takong a maiserserrek a maparti iti slaughterhouse iti siudad nga awan dagiti papelesda ket suspetsana a naggapu dagitoy iti sabsabali a probinsia iti baet ti kaadda ti pammilin ni Gov. Luis “Chavit” Singson a saan a maipalubos a maiserrek dagiti oversized a baboy iti quarantine checkpoint iti Barangay Bio, Tagudin.

Impalgak ti slaughterhouse master nga adda average a nasurok a sangapulo ken umabot pay iti duapulo a takong ti maparparti iti Vigan City iti maysa nga aldaw, depende iti masapul dagiti agbagbagnet, ken agar-aramid iti barbecue ken longganisa.

Karne ti takong ti kangrunaan a masapul dagiti agbagbagnet ken agar-aramid iti longganisa iti Vigan City agsipud ta saan dagitoy a namanteka.

Kinuna ni Quitoriano nga iti pakabuklan, adda 70 a mapar-parti a baboy iti siudad ti Vigan.

Innayon ni Quitoriano nga iti dayta a kaadu dagiti maparparti a takong iti slaughterhouse ti Vigan, mamati nga aggapuda iti sabali a probinsia agsipud ta manmano met dagiti dadakkel a hog raisers iti Ilocos Sur.

Kinuna ni Quitoriano nga adda  dagiti negosiante ti baboy a mamindua iti makalawas nga agbiahe. Segun iti slaughterhouse master, agdagup iti 17 ti bilang dagiti baboy a makarga ti lugan ti negosiante iti maysa a biahena.

Nupay kasta, kinuna ni Quitoriano nga agsipud ta nakalusot dagiti takong iti quarantine checkpoint, “kaawatan  a clean and in good health” dagitoy a maparti iti slaughterhouse.

Nadakamat ni Quitoriano nga adda dagiti negosiante a kaykayatda ti aggatang kadagiti aggapu iti biahe ta mautangda dagiti baboy ken maideliber a mismo iti balayda.

Iti kallabes, nagreklamo dagiti hog raisers ken ni Gov. Singson gapu ta kaykayat dagiti agparparti iti baboy ti gumatang kadagiti hog traders manipud sabali a probinsia agsipud ta nalaklaka nga amang dagiti lakoda a baboy.

Inkalintegan met dagiti aggatgatang iti baboy a nakisang ti magatangda a baboy iti probinsia isu a gumatangda kadagiti negosiante ti baboy a sumsumrek iti probinsia.

Iti maysa a dialogo iti nagbaetan dagiti hog raisers ken agparparti iti baboy, impatalged dagiti agtartaraken iti baboy a kabaelanda a suplayan ti kasapulan dagiti agparparti iti baboy.

Nupay kasta, adda dagiti alegasion nga adda panagpasuksok a maisaysayangkat iti quarantine checkpoint tapno maipuslit dagiti oversized a baboy.

Ngem kinuna ni Provincial Veterinarian Joey Warren Bragado nga awan ti kinapudnona dayta nga alegasion.

Kinunana a mairekord amin a  maiserrek a baboy iti probinsia ken maresibuan dagitoy kas iti intuding ti gobierno probinsial a bayadan iti tunggal ulo ti maiserrek a baboy.#