Taldiap iti United Filipino Council of Hawaii (UFCH) iti Maika-50 nga Anibersariona (Umuna iti dua a paset)

NAANGAY itay Hulio 25, 26, 2009 ti tinawen a panagkombension ti United Filipino Council of Hawaii (UFCH) iti Isla ti Molokai.

Kas ninamnama da UFCH president Eddie Agas, Sr., ken ni Benny Piros, chairman ken coordinator ti kombension, adu dagiti delegado a naggapu iti nadumaduma nga Island Councils a pakairamanan ti Oahu, Maui, Kauai, Big Island, Lanai, a mangibagi kadagiti nadumaduma a gunglo iti sidong ti UFCH.

Friendly Isle, wenno mannakigayyem nga isla ti maysa nga awag ti Molokai. Dati a lonely isle, sukog-palloka wenno Indian moccasin ti tabas ti Molokai. Addaan iti 260 square miles a kalawana, 38 a milia a kaatiddog ken 10 a milia iti kaakabana. Masarakan ditoy ti Mt. Kamakou, ti katayagan a bantay iti kangatona a 4,961 a kadapan manipud iti sea level. White Kukui Blossom ti national flower daytoy nga isla, ket ti Kaunakakai ti sentro ken masao nga ili. Adu a kadaraan ti agnaed itoy a puro.

“Umaykayo, ur-urayendakayo,” daytoy ti nabara a kablaaw dagiti agassawa a Benny ken Fely Piros kadagiti delegado.

Iti daytoy a pasken, insaganaan a talaga dagiti agassawa. Malaksid ti kuros, adda pay karne ti ugsa a naidasar para kadagiti sangaili.

UFCH: Idi, Ita ken iti Masakbayan

Bassit ti ammomi iti rugi ti United Filipino Council of Hawaii (UFCH) ngem gapu iti pannakigamgamulomi iti komunidad a Filipino manipud idi simmangpetkami ditoy idi Hulio 1971, direktamente/indirektamente ken babaen ti komite ken bukodmi a a panagsukisok, naammuanmi a nangrugi ti gunglo idi Hunio 1959.

Ket idi dawaten ni UFCH president Eddie Agas, Sr., nga isaganami ti taldiap ti gunglo mainaig iti selebrasion ti maika-50 nga anibersariona ita a 2009, nupay adda panagkitakitmi aglalo ket saankami nga autorisado, ngem gapu iti pateg daytoy a dawat, ibasarmi dagiti agapadenmi ditoy kadagiti nabasa ken padasmi.

Dakamatenmi ditoy nga idi circa 1921, addan dagiti immun-una a nabangon a gimong ngem saanda a nagpaut.

Ngem idi simmangpet iti Hawaii ni Ambassador Juan C. Dionisio, Sr. idi Setiembre 1959, indauluanna ti pannakabangon ti gunglo dagiti Filipino ditoy gapu nadlawna a kasapulan ti komunidad ti maysa a grupo dagiti Filipino iti Hawaii.

Panagtitipon dagiti “Agila”

Inrusat ni Ambassador Juan C. Dionisio, Sr. ti kampania idi Septiembre 1957 para iti panagtitimpuyog dagiti dadaulo a Filipino a mangibagi kadagiti gunglo sibiko iti sapasap a Teritorio. Ni Ambassador Dionisio iti nangpadaras iti panagtitipon dagiti “agila” babaen iti face-to-face dialogues.

Dagiti sumaganad dagiti dadaulo: Anastacio Luis (Big Island), Marcelino Francisco (Kauai), Liberato Abado (Lanai), Rafael Cabebe (Maui), ken Antonio Abrahano (Molokai), Ni Justo dela Cruz (Oahu) ti nagpaay a dadaulo dagiti nadumaduma nga isla.

Ni HPD Lt. Roland Sagum ti nagpaay a chairman iti umuna a konbension a naangay iti Hawaiian Village Hotel idi Hunio 19-21, 1959. Isu pay ti nabutosan nga umuna a presidente ti UFCH a nagpaayanna idi 1959-1961. Ni Sagum ti presidente idi nagbalin ti Hawaii a maika-50 nga State of the Union idi Agosto 21, 1959, kalpasan ti Alaska, ti maika-49th nga estado.

(Adda tuloyna)