Talek pay ni Kasinsin ta addan telebisionda! (Maikadua a paset)

Sarita ni Judith Molina Simon

 

Tinurongko laengen dagiti katawmi. Sabagay, husto ni nanang. Narigat unay ti panagbiagmi ket makitak no kasano ti rigatda ken ni tatang a mangisaksakad iti panagbiagmi. Naimbag la ketdin ta duduakami pay laeng nga annakda. Ag-kinderton ni Joy iti sumaruno a panaglukat ti klase.

Awan nabati, kuna ni nanang, ngem ammok a kunana la adiay. Managsalimetmet ni nanang. Saan a barayuboy. Maipagpannakkel nga ina. Nalabit, isagsaganada ken ni tatang a pagbasaminto nga agkabsat ti magangganansiada nga agbangkag.

Nagawis ni tatang a mapan agbuya apaman a nalpaskami a nakapangrabii.

“Dika pay la ket aginana,” intubngar ni nanang. Kupkupinenna dagiti linabaanna.

“’Pagbiitkami laeng, Baket,” kinunana. “Padasen met, a, ti agpalpaliwa sagpaminsan.”

“Sika la ngaruden ti mapan. Dimon itugtugot ni Anton ta agbasa kadagiti leksionna.”

Minisuotak iti nalimed ni nanang.

“Aniaka ketdin, ‘ya, Baket, ita laeng met ket. Pagustuamon ‘ta anakmo ta dinto ket ar-arapaapenna ti dina pannakabuya,” inrason ni tatang. “Bay-am ta agrelaks met sagpaminsan.”

Kasla dimmakkel ti panagkitak ken ni tatang kadayta a kinunana.

“Di met, ‘ya, a kayatmo a maunaan ni Pidong?” kinitanak ni nanang.

“Wen, ‘Nang,” kinunak. Ni Pidong ti  karibalko iti maikatlo a puesto iti kalkalpas a second grading. Isu ti third idi Grade Two-kami idinto ta maikawaloak laeng.

“Met la gayam!” insipatna iti patongna ti kupkupinenna. “Ipamaysam ngarud ti agbasa. Awan mapukawmo no dika mapan agbuya…”

Immawer ti aayatak a mapan koma met agbuya. Husto ni nanang.

Dakkel ti ayatko a maarusko ni Pidong. Naglastog ngamin. Kunam no asino nga agsasao. Kasla isu ti kalaingan!

Sinolo ni tatang ti napan nagbuya.

“NAGPINTAS ti binuyami, Baket!” inlastog ni tatang iti kabigatanna. “Immayka koma…”

“’Nia met ti binuyayo?” immusiig ni nanang. Aggagao iti pammigatmi.

“Drama, Baket!”

“Drama?”

“Nagpipintas dagiti artista kunam!”

“Ania met ti paulona?”

“Nalipatakon.”

“Ay, kabawka a talaga. Dayta lang, malipatam pay. ‘Bag koma no sangakilometro met ti taytelna dayta a binuyam.”

Napamusiig ni tatang. Nagbuggo sa nagtempla iti kapena.

“Malagipko, inkas ni Charlie ‘diay TVda?”

“Wen kano agraman ‘diay antenna.”

“Nalawag met laeng?”

“Adda kirkirayna bassit ngem atlis kolord!”

“Makabannog ngarud, a, iti mata.”

“Di bale ta igatanganto kano ni Kasinsin iti buster.”

Napamuttalengak. “Apay dayta, ‘Tang?” inamadko ta nalagipko lattan ti booster a pagpakpakanko kadagiti manokmi.

“Tapno kan’ lumawag ti mabuya,” kinunana. “Sabali dayta buster a pampanunotem,” kasla napugtuanna ti adda iti isipko

INYAWAG ni Ma’am VC ti resulta ti test-mi kadayta nga aldaw. Maragsakanak ta maikaduaak a kangatuan. Nganngani di nakagudua ni Pidong.

“Aniat’ kinuam, Alfie?” inamad kenkuana ni Ma’am. “Dikan sa met nag-review?”

Nakadumog lattan ni Pidong. Awan simngaw a timekna. Kasla nakutoran a manok. Di kasla idi nga umarimbangaw no mayawag ti naganna a maysa kadagiti kangatuan.

“Sungbatannak, Alfie…”

“A, e, kua, Ma’am…” timmangad iti bobeda. “Adda ngamin bisitami isu a diak nakapagrebio.”

Napangangaak. Awan met nakitak a bisitada. No kuna ni tatang a napan nagbuya idi rabii a kasta unay kan’ ti panangmitirna kadagiti mabuya. Nakauy-uyong kano pay kadagiti ubbing no kasta nga adda mailaw-an nga agtimek.

Naragsakan da tatang ken nanang idi impadamagko kadakuada ti resulta ti eksamenmi.

“Ala , ipasnekmo nga’d, Anak,” kinuna ni nanang. “Ammok, kayam ni Pidong…”

SABADO. Kalkalpasko a nagdalus iti balay. Immallatiwak iti yan da Pidong apaman a nakadigosak. Nadanonak dagiti kapatadanmi nga agay-ayam iti siatong iti paraanganda.

Binirok dagiti matak da Buyan ken Pidong. Awanda. “Da Pidong?” kinunak.

“’Dada dita uneg,” kinuna ni Etong. “Agbuybuyada iti karkarton…”

“Apay a dikay’ mapan agbuya?”

“Nangrikepda met.”

Isu pay la ti pannakadlawko a nakarikep ti ridaw ken nakatangep pay dagiti tawada.

“Awan ni Anti, ‘ya?”

“Rimmuar itay. Makiplasa kano.”

Napangilangilak. Anian da Buyan ken Pidong!

Immariwawa ti aglawlaw. Makankantiawan da Bago, Ambang ken Siloy ta masiatongda.

Ad-addan ti arimbangawmi idi immawer ti kudisi iti adayo a pinatit ni Uling. Kaduana da Erbot ken Sawi. Bagina a siatongen ni Ambang.

“Tagariyo man!” pagammuan ta naibugkaw. Ni Buyan ti nakakusilap iti ridawda. Pinidutna ti sagadda ket umayen iti yanmi.

“Pangas!” kinuna ni Dayog kenkuana. Nagtaray idi ablatan ni Buyan.

“Pulongkanto!

“Pulungpulong, anak ti takong!’ inkorusmi sakam simmiag a nangsurot ken ni Dayog.

(Adda tuloyna)