Talek pay ni Kasinsin ta addan telebisionda! (Maudi a paset)

Sarita ni Judith Molina Simon

 

IMMALLATIW ni Anti Beth kadayta a malem. Nadanonannakami ken ni nanang iti paraangan nga agisagsagana iti dengdengenmi nga utong.

“Umayka koma met agbuya, ‘Birat, ta di lattan ni Kayong ti um-umay,” kinunana.

“Adu met ti trabaho, Abirat,” kinuna ni nanang.

“Uray ket rabii met. Naimbag laeng met a pangiliwliwagan iti dudukot, a!”

“Bay-amon, ‘Birat.”

“Maudika laeng iti mapaspasamak no kasta, ‘Birat.”

“Adda met ‘diay transistormi a pagdengdenggak…”

“Ay, duma la ti TV, kunam sa! Makitam ti aktual a napasamak ken mapaspasamak!”

Saan a nakauni ni nanang.

“Ammom, ‘Birat, sipud adda ‘diay TV-mi, kasla diak marikna ti bannogko nga agiwakwakas iti trabaho ‘diay balay. Ta kasano, mabalinko ti agbuya uray madamaak nga ag-washing!”

“Naimbagka pay, Abirat,” inyapal ni nanang.

“Ay, wen, a, Abirat. Pinilitko ngarud ni kayongmo a gimmatang tapno adda pagbuybuyaak no kasta a panawandak. Umallatiwka ngamin no kua ta duata nga agbuya…”

“Saanen, ‘Birat.”

“Ay, wen, malagipko. Panagririkepto manen ti klase. Ammom, ita pay laeng, isagsaganakon ti bagik. Sigurado nga adda manen ‘diay anakko iti top three!”

Napamuraregak. Apay, dina ngata nakita ti grado ni Pidong itay third grading? Nagdakkelan ti bimmabaanna!

“La ketdi, a, Abirat,” impatiray-ok met ni nanang. “Nalaing ngamin ‘diay anakmo…

“Immala kaniak, ‘Birat.”

“Uray, a, no nakitamon ‘diay gradona itay third grading?”

“Ay, wen, ‘Birat. Bimmaba ti gradona ngem isu kan’ latta ti maikatlo a kangatuan. Nauyong kan’ ngamin ‘diay kabarbaro a titserda iti Math a simmukat ken ni Ma’am Grace a napanen idiay abrod. Isu a dayta, bimmaba kan’ amin a grade-da nga agkakaadalan.

Nauyong? Ket no naganus ken nagsingpet ni Ma’am Mylene a kasukat ni Ma’am Grace!

PANAGRIKEP ti klase. Kimmuyogkami kada Pidong, Buyan ken Anti Beth ta nakikalugankami iti traysikelda. Permi a panangipasindayag ni anti ti impadaitna a badona. Nakaad-adu pay a burloloyna.

Di man agsasao ni nanang, ammok a dakkel ti apalna. Daydi manen inusarna idi napan a tawen ti usarna ita. Ngem, ala, uray ta nadalus met. Sa la mausar no kastoy a panagririkep ti klase.

Dimi kinakuyog ni tatang ta iplastarna pay dagiti mapanawanmi. Sumarunonto lattan.

Sao a sao ni anti idi makagtengkami iti pagadalan. Sangkadayawda dagiti burloloyna. Maayatan man la unay no kasta a dayawenda.

Nadanon ti batangmi a Grade Three. Nagpasango ni Ma’am VC.

Inyawagna a dagus dagiti maribonan apaman a nakakablaaw. “First honor,” kinunana, “goes to… Princess P. Menor!”

Napigsa a sipsipat ti naipasabat ken ni Princess idi umuli iti entablado. Pinampaminsanen nga inwaragawag ni Ma’am dagiti awardna a Best in Math, Best in English, Best in Science ken Most Industrious ken Most Behave.

“Ti anakkon ti sumaruno, ‘Birat!” inkalbit ni anti ken ni nanang. “Naunaanna kano ket ti second honorda idi…”

Immisem laeng ni nanang.

“Second honor,” ni manen Ma’am, “goes to…Jethro Simon Molina!”

Siak daydiayen! Adayo iti naganko iti sirok ti latok nga Anton.

Timmakderkami ken ni nanang. Nagturongkami iti entablado.

Napalalo a libbi ni anti idi mataldiapak. Dina siguro ninamnama nga abakek ni Pidong.

Sangkasiputko ni anti bayat ti panagtakderko iti sango. Taliaw a taliaw. Agkaling-etan payen. Awanen ni Pidong iti abayna. Nasiputak a limned itay.

Siamkamin iti sango ngem di pay naawagan ni Pidong.

“… And now, the last but not the least,” kinuna ni Ma’am, “tenth honor goes to… Alfie A. Molina!”

Mababain ni Pidong a nagpaentablado a naggapu iti bakrang ti stage. Tumakder a saan met ni anti. Idi kuan, naglusdoyen.

Ngem imbes a matarantaak, kasla ketdin kitkitaek ti TVda a waswasayenna apaman a makapuot idiay balayda.#