Talek pay ni Kasinsin ta addan telebisionda! (Umuna a paset)

Sarita ni Judith Molina Simon

 

AGAAY-AYAMKAMI kada Buyan ken Pidong iti paraanganda. Umariwawa dagiti padami nga ubbing nga agbuybuya. Itayak pay a tira a tira. Diak pay napupok. Hagard ti atsuwete a tarampok. Naaweng pay.

Nakatadtademen ti kusilap da Buyan ken Pidong kaniak. Napnon iti gurad ken abut dagiti tarampoda. Makantiawanda unayen. Dida pay timmira ta siak ti kano itay.

Igalgalutko manen ti allitan ti tarampok idi sumungad ti traysikel ni Angkel Charlie a tatang da Buyan ken Pidong—  a kasinsin ni tatang. Sinsao, pinidut dagitoy ti tarampoda ket sinabetdan ti amada. Nakudkodko laengen ti ulok.

“Yeheyyy! ‘Dan tibimi!” inriaw ni Buyan. Gred wanna.

Linawlawmi ti traysikel. Permi a mulagatmi kadagiti padak nga ubbing. Nagdakkel nga agpayso a TV ti ibabbaba ni angkel.

“Aglisikayo, ‘la,” imbugtak kadakami ni angkel ta naserraanen ti pagnaanna.

Nabisngaykami. Ngem sinarunomi man met laengen idi yunegna iti balayda.

“Dikay sumrek!” indil-ag ni Buyan. “Nagrurugit dag’ta sakayo!”

Naglilinnetletkami a simmirip iti tawa. Impuesto ni angkel ti TVda iti suli ti bungalow a balayda.

“Ni nanangyo?” inamadna kadagiti agkabsat apaman a naiplastarna ti TV.

“’Da iti kantina ni Anti Kujak,” ni Pidong ti simmungbat.

“’Pan gimmatang iti pagpalamiis, ‘Tang,” innayon ni Buyan.

Nagtungtung-ed laeng ni angkel.

“Yopenmo man ta agbuyakami, ‘Tang,” maay-ayatan ni Pidong a mangap-apros iti TVda.

“Di pay mabalin,” kinuna ni angkel.

“Apay, Tatang?” nagmisuot ni Buyan.

“Madi pay naiplastar ‘diay antenana.” Rimmuar ni angkel ket innalana ti nakaplastik iti rabaw ti traysikel. Inasembolna daytoy ket agsasanga metten idi malpasna.

“Pangiplastaram kadayta, ‘Tang?” inyumbi ni Buyan.

“Dita likud ti balay.”

“Awan met ti kasta ti TV da Salswit ket makabuyada met latta,” kinuna ni Pidong. Ni Celso a kaadalanmi iti Gred Tri ti kayatna a sawen. Iti haywey ti balayda.

“Wen, a, ta nakakebolda. Di met pay ngamin simrek ti kebol ditoy puroktayo,” insungbat ni angkel.

“Ipaiserrektayo, a, ‘Tang,” ni Buyan.

“Kayatda, ‘ya, ngarud no agmaymaysatayo nga agpakebol. Lugidan, a!”

Ditoy purokmi nga Amianan, isuda pay laeng ti adda TVna. Kaaduanna met ketdin kadagiti nasurok a duapulo a balbalay ti nakapakoriente.  Panagtalon ken panagbangkag ti panggedan ti kaaduan. Da angkel ti maysa kadagiti tallo nga adda traysikelna.

Simmangpet ni Anti Beth. Mangigis ti isemna idi makitana ti TVda.

Nagawidak metten idi mataldiapak nga agalas singkon iti relo da Buyan. Tulongak pay ni nanang. Kasangsangpet ni tatang a nadanonak.

Impadamgko ti kaaddan ti TV da angkel.

“Agpayso?” naklaat ni tatang. Inunnatna ti siketna a nalabit naktangan a nagmalmalem iti bangkag.

Nagtung-edak laeng.

“’Bag pay ken ni Kasinsin ta agluplupos latta,” naisennaayna.

“Agalistoka met ngamin, a, tapno dim’ lattan bagi ti umap-apal,” insalpika ni nanang a madama nga agimuri iti alukon a pangrabiimi

“’Nia pay laeng, ‘ya, met ti pagkunaam iti ar-aramidek, inada?” adda pasugnod iti timek ni tatang.

“Aysus, ‘atoy a laklakayan ta nasukit man ngatan ti susukitanna,” inyisem ni nanang. “Wen, ammok a nagagetka. Dayta ngarud ti pagyamyamanak iti Namarsua ta sika ti dimteng iti biagko…”

Ni met tatang ti napaisem. Nagbagas man ti kidmatna ken ni nanang.

“Gumatangtay’ man met iti TVtayo, Tatang,” kinunak met. Isagsaganak ti tuyo a kanen dagiti manokmi.

“Ania?” napabullad la ket ngarud ni tatang. “Ti la mapampanunotmo, Balong,” inay-ayamna ti ulok. “Pangalaantay’ koma iti igatangtayo ngay?”

“Iti naglakuanyo kadagiti nateng, a,” inrasonko. Kalkalpasda a nailako ti bunga  ti gudua ektaria a kinarabasaanmi.

“Awanen, a,” kinuna ni nanang. “Nganngani pay di immanay a pinagbayad iti utang nga abono.” Inisemannak. “Ala, lalaingem ketdi ti panagbasam ta uray gatangemto amin a kayatmo inton makapagtrabahokan.”

Nakudkodko laengen ti ulok. Kaanonto pay ngarud nga agka-TV-kami?

(Adda tuloyna)