Footer

Tallo a lallaki nagpaskua iti pagbaludan

CANDON CITY – Tallo a lallaki ti nangpalabas iti paskua iti pagbaludan kalpasan a natiliw ida dagiti polis a nagikut iti maiparparit a droga ditoy siudad ken iti  ili ti Burgos.

Iti Candon City, natiliw ni Garry Gabor y Gonzalo, 26, baro, ken residente iti Barangay San Agustin ditoy siudad babaen ti entrapment operation nga inwayat dagiti operatiba ti siudad nga indauluan ni Police Inspector Ricardo Naungayan sadiay Barangay San Antonio idi agarup 10:20 ti rabii idi Disiembre 25.

Narekobre dagiti polis ti maysa a semi jumper Racal motorcycle a mapapati a kinarnap ni Gabor idinto a nakakumpiskada pay iti ikutna iti maysa a bassit a heat sealed a plastic sachet a naglaon iti mapapati a shabu, aluminum foil, lighter, Cherry mobile phone ken kuarta iti nadumaduma a denominasion nga agdagup iti P2,308.00.

Sakbayna, tinawagan ti suspek ti di nainaganan nga akinkukua iti nakarnap a motorsiklo ket dimmawat iti P6,000.00 tapno maalana ti lugan. Ngem inreport ti biktima ti panangkontak kenkuana ni Gabor ket plinano ti polis-Candon ti entrapment operation  maikontra iti suspek a nagtungpal iti pannakatiliwna.

Naipan ti suspek ken ti motorsiklo kasta met dagiti dadduma pay a nakumpiska iti ikutna iti police station para iti umisu a disposision ken dokumentasion.

Nakalista ni Gabor iti drug watch ti shabu nga agop-operasion iti siudad.

Kabayatanna, dua a lalaki ti natiliw bayat ti panagrekorida ti barangay captain sadiay Subadi Sur, Burgos idi agarup 4:30 ti malem ti Disiembre 25.

Nabigbig dagiti suspek a da Leonilo Pimentel y Domine, 33, naasawaan, ken ni Rafael Aguayo y Domingo, 30, naasawaan, agpada a residente iti Barangay Taliao, Burgos.

Segun iti report, agpatpatrolia ni Barangay Captain Waldimar Dandoy iti Barangay Subadi Sur idi nakitana ti dua a lalaki a nakalugan iti nangisit a Honda Wave 100 a nakaiggem iti DVD disk.

Idi makita dagiti dua ni Dandoy, naglibasda a nagpaamianan ngem binalangan ida ti barangay captain sana dinamag no ania ti ig-iggamanda.

Boluntario nga inyawat dagiti suspek ti dua a heat sealed plastic sachet a mapapati a naglaon iti shabu nga agdagsen iti .01 gram ken agbalor iti sumurok kumurang P2,000.00.

Kinumpiska pay dagiti polis ti motorsiklo dagiti suspek ken dua a selponda para iti dokumentasion ken disposision.#