Tallo a lawas nga illegal-drugs Czar

KASANO a talaga ti kinaserioso ti agdama nga administrasion iti kampania a mangpaksiat iti panagraira iti illegal a droga iti Pilipinas?

Adu nga umili dagiti nasdaaw idi kellaat a dinutokan ni Presidente Rodrigo Duterte ni Bise Presidente Leni Robredo kas co-chairperson ti Inter-agency Committee Against Drugs iti laksid a ti Bise Presidente ket lider ti oposision ken kritiko ti gobierno iti nadara a kampania kontra illegal a droga. Nangnamnama dagiti umili a serioso ni Duterte iti panangapointarna ken ni Robredo kas illegal drugs czar ta makatulong ti Bise Presidente iti pannakasolbar ti problema a saan a masolsolbar ti nasurok a tallo a tawenen nga administrasion babaen kadagiti baro a kapanunotan ken singasingna.

Ipaspasindayag man ti administrasion a naballigi ti kampania kontra illegal a droga gapu iti kaadun dagiti napapatay ken simmuko a drug personalities, ken kaadu dagiti nasamsam nga illegal a droga. Ngem saan a dayta ti umno a pagrukodan ken pagbasaran iti panagballigi ti kampania. Iti nasuroken a tallo a tawen a panagakem ni Presidente Duterte ket inaldaw nga adda latta dagiti mapappapatay a mainaig iti droga ken adda latta dagiti matiltiliw a suspek. Nasuroken a 5,000 dagiti napapatay no ti pagbasaran ti report ti Philippine National Police, ngem ad-adu met nga amang ti bilang dagiti human right advocates a kaaduanna ket dagiti street pushers a napanglaw ken awanan-gaway.

Adda man dagiti napapatay ken naaresto a maibilang a drug lords ken protector pakairamanan dagiti politiko ken kameng ti PNP ket sumagmamanoda laeng. 

Nangnamnama dagiti umili nga iti panangawat ni Robredo ti pannakadutokna kas co-chairperson ti ICAD ket dakkel ti maitulongna ti pannakaipababa ti bilang dagiti mapappapatay nga adda pannakainaigna iti illegal a droga, ket maiturong ti kampania iti pannakaaresto ken pannakadusa dagiti big-time drug lord ken dagiti kakunsaboda iti gobierno.

 Ngem kalpasan laeng iti nasurok a dua a lawas a panagakem ni Robredo kas co-chairperson ti ICAD ket inikkat ni Duterte gapu ta awan kano ti talekna kenkuana ken saan a kontento kadagiti ar-aramiden ti Bise Presidente.

Nakasaysayang ti pannakaikkat ni Robredo kas Illegal Drugs Czar ta nasayaat dagiti sirmata ken tarigagay ti Bise Presidente a ti problema ti illegal a droga ket matratar koma kas problema iti salun-at, ken kalikagumanna a maisardeng dagiti nagadu a pammapatay mainaig iti kampania kontra illegal a droga, ken matiliw ken madusa dagiti big-time drug lords, saan ketdi a kaaduanna a dagiti laeng aglakolako iti gramo-gramo a shabu.

Nagkas-ang a panunoten ta nagadun nga street pushers dagiti napapatay ken nakabalud, kabayatan a siwawaya dagiti nainaig iti pannakaiserrek dagiti tinoleda a shabu iti Bureau of Customs. Agtultuloy pay ti panagmando dagiti big-time drug lord iti negosioda uray no nakabaluddan sadiay New Bilibid Prisons nga imatonan ti Bureau of Corrections.

Masayangan ni Senador Panfilo Lacson a sigud a Hepe ti Philippine National Police, masayangan iti dagus a pannakaikkat ni Robredo iti baro nga akemna ta nakipagkonsulta kenkuana ti Bise Presidente maipapan kadagiti padas ken balakadna iti kampania kontra droga. Inaklonna nga umno ti direksion ken plano ti Bise Presidente kas co-chairperson ti ICAD. Ngem awan ti mamaayna dayta ta awan met gayam ti talek ti Presidente ken ni Robredo.

Mairaman dagiti adu nga obispo, lider ti Simbaan ken human right advocates a masayangan iti pannakaikkat a dagus ni Robredo kas co-chair ti ICAD nga awan iti umno a gapu ta mamatida a dakkel ti maaramidan ti Bise Presidente iti pannakapaksiat ti panagraira ti illegal a droga nangruna ti pannakaisardengen dagiti adu a pammapatay ken pannakareporma dagiti naigameren iti dayta a dakes a bisio.

Saanen a nakaskasdaaw kadagiti adda iti oposision iti saan a panagpaut ni Robredo iti baro nga akemna. Idi pay sakbay nga awaten ti Bise Presidente ti baro a posisionna ket addan dagiti kapartiduanna iti Liberal Party pakairamanan ni Senador Francis Pangilinan a nangbalakad kenkuana a palab-og laeng ti pannakadutokna ken awanto met laeng ti ipaay ti Presidente a naan-anay nga autoridad. Ngem iti laksid ti panangublag dagiti dadduma a lider iti oposision, inawat latta ni Robredo ti pannakadutokna ta kayatna met ti makatulong iti administrasion iti pannakasolbar ti nadagsen a problema iti illegal a droga.

No man pay nadutokan ni Robredo iti non-cabinet position, wenno undersecretary kas co-chair ti ICAD, kaduana ni Director General Aaron Aquino ti Philippine Drug Enforcement Agency, ken awan ti nalawag nga autoridadna, nagbalin a naregta iti baro a posisionna. Nakipagtaripnong kadagiti kameng ti ICAD pakairamanan ti Interior and Local Government Secretary Eduardo Año, Justice Secretary Menardo Guevarra, Philippine National Police Officer-In-Charge Lt. Gen. Archie Gamboa, ken dadduma pay a mangidaulo kadagiti maseknan nga ahensia ti gobierno.

Adu dagiti mamati a maysa kadagiti gapu ti nakaikkatan ni Robredo kas co-chair ti ICAD ket ti tarigagayna a maaddaan iti access kadagiti classified information kadagiti high-value target a drug lords. Ibilang ni Duterte ken dadduma pay nga opisial a security risks wenno narisgo no maikkan ni Robredo iti access kadagiti classified information ket mai-leak kadagiti taga-sabali a pagilian. Ngem rebbengna laeng a maammuan ni Robredo dagiti nalimed nga impormasion, ngem, kas kuna ti Presidente, awan ti talekna kenkuana.

No awan ti talek ni Duterte ken ni Robredo, apay a dinutokanna iti baro a saadna? Agamak kadi ti Presidente a maammuan ti Bise Presidente dagiti palimed iti kinasiasino dagiti adda iti likudan iti panagraira ti illegal a droga? ●

READ: Baro nga akem ni VP Robredo iti kampania kontra illegal a droga