Footer

Tallo a lugan, nainbolbar iti aksidente

SAN JUAN, Ilocos Sur – Tallo a lugan, maysa nga Isuzu Elf, maysa nga Isuzu Forward ken maysa a top down a traysikel ti nainbolbar iti aksidente iti national highway a sakup ti Barangay Bacsil, San Juan, Ilocos Sur idi sardam ti Enero 18.

Segun iti report,  nadungpar ti Isuzu Forward a minaneho ni Dante Morales y Baclig, 54, naasawaan, residente iti Barangay Salomague, Cabugao, Ilocos Sur ti kutit ti top down tricycle a minaneho ni Anastacio Tabaniag y Tabbada, 44, baro, a puon ti nakadunoranda agraman dagiti inluganna iti traysikel a pakairamanan ti kalib-inna a ni Jennymar Alejo y Valdez, 45, ken dagiti annakda a da Jansen Alejo, 6, ken Mica Alejo, 4, agpapadada a residente iti Barangay San Pablo ken nakasapgidanna pay ti makannigid a paset ti kinasinnabatna nga Isuzu Elf a minaneho ni Freddie dela Cruz y Batoon, 36, naasawaan, residente iti Barangay 56, Bacsil, Laoag City.

Naitaray da Tabaniag, Alejo, ken dagiti ubbing iti Magsingal District Hospital tapno mataming dagiti sugatda.

Kabayatanna, naidungpar ti maysa a kotse iti puon ti marunggay sa naisarubsob iti kataltalonan a puon ti nakadundunoran dagiti naglugan gapu iti panangliklik ti drayber iti kasinnabatna a lugan idi rabii ti Enero 18 iti Barangay Mambog, Sta. Cruz, Ilocos Sur.

Immuna a naitaray iti Resonable Hospital iti Candon City sada naiyalis iti Metro Vigan Cooperative Hospital iti Bantay, Ilocos Sur para iti pannakataming dagiti sugatda ni Emilio Batin y Joaquin, 46, naasawaan, residente iti Barangay Rizal, Santa, Ilocos Sur, ken dagiti kakaduana a da Peddie Bañez, 27; Ruby Villanueva, 25; Jayrus Ivan Bañez, 1, agpapada a residente iti Barangay Pantay Daya, Vigan City; ken Manny Arca y Pajo, 23, residente iti Barangay Pantay Laud, Vigan City.

Iti insayangkat dagiti polis nga inisial nga inbestigasion, idi agarup alas 11:55 ti rabii ti Enero 18, agpalaud a direksion ti Mitsubishi Adventure a minaneho ni Batin ket idi addan ti lugan iti Barangay Mambog, Sta. Cruz, obertekanna koma ti maysa a lugan ngem kinasinnabatna ti maysa a lugan nga agobertek met, isu a kinabigna ti manibela tapno liklikanna ti kasinnabatna ngem nadungparna ti puon ti marunggay sa nagderetso iti kataltalonan.#