Ababa a Nobela: Tallo nga aldaw, uppat a rabii (Umuna a paset) | Tawid News Magazine - Weekly Ilocos News 📰

Tallo nga aldaw, uppat a rabii (Umuna a paset)

DIMSAAG da Randolf, Rey,  Robert, ken Freddie iti naglugananda a Florida Trans. Nakadanondan iti Tuguegarao.

Kinita ni Randolf ti oras. Alas dos iti parbangon. Nasapa unay a mapanda iti Callao Caves Resort, Penablanca, a pakaangayan ti maika-35 a Kumbension Nasional nga angayen ti Gumil-Filipinas. Tallo nga aldaw a taripnong dagiti Ilokano a mannurat iti sapasap a pagilian ken iti ballasiw-taaw.

“Ikidemtayo pay iti dua oras,” kinuna ni Randolf sana insungo dagiti nagaabay a kayo a pagtugawan.

Tunggal maysa, nagsibirok iti pagiladanna.

Indisso ni Randolf ti nangisit a bag a naglaon kadagiti sumagmamano nga aruatenna iti abay ti bag dagiti kakaduana sana inyunnat ti nautoyan a bagina iti natangken a kayo a pagtugawan.

“Damagko a nalalapsat dagiti babbai ditoy Cagayan,” kinuna ni Rey. “Ania ngata a gasat ti agur-uray kaniak ditoy iti tallo nga aldaw?”

“Ayna, madlawmo latta no nawayway ti tali ni Rey,” inkantiaw ni Freddie. “Saanka nga agbasakbasak ditoy, lakay, amangan no ti laengen naganmo ti agsubli iti Ilocos Sur.”

“Nagbayag metten ti bigat,” insakuntip met ni Robert. “Aggagatelen ti dapanko a sumrek iti Callao Caves. Kayatko a takuaten ti lansadna, aglalo no adda kaduak a balasang.”

“Agtanangka, lakay,” kinuna ni Freddie. “Amangan no sabali a kueba ti maserrekmo.”

“Basta kueba, addaan iti naisalsalumina a batombalani a mangsul-oy kenka a mangtakuat iti misteriona,” insungbat ni Robert.”

“Ti la mataltalanggutangyo,” imballaet ni Randolf. “Dikayo kadi nabannog a nagbiahe?”

“Dumngegkayo, kakabsat iti panagsermon ni Fr. Randolf de Castro,” pinagakkub ni Rey dagiti dakulapna. “Ayna, lakay, no dimo baliwan ti panirigam iti biag, kumriit ni Illom a di man la makaitugkel iti bunubon. Dimo la tultuladen ni Freddie. Uray poste, no ikkam iti pandilingna ket sarigsiganna.”

Nagkatawada amin.

“Nakitak ti ladawan ni Miss Cagayan a naipablaak iti Rayray Magasin,” binaliwan ni Freddie ti tungtongan. “Makaalino ti panagis-isemna. Agsiglatka, pari Randolf, bareng makaisangpetka iti kaulesmo iti Ilocos Sur.”

“Agpipinnustatayo, imaima nga aggawid ni Randolf,” kinuna ni Rey.

“Nagadu nga intsik, siak la ti makitkitayo,” kinuna ni Randolf. “Ngem ne, no magustuak ti mutia ti Cagayan, apay ketdin a diak agbati?”

“Dayta man,” intapik ni Freddie. “Pari, napeklanka a Bigueño. Ipakitam nga uray sadino a disso, saan a paatiw ti Bigueño.”

Naglikig ni Randolf sa nagkidem. Intuloy dagiti kakaduana ti nagtutungtong. Ti la pagturturongan ti estoriada sada aggagarakgak.

Daytoy ti panggustuan ni Randolf kadagiti gagayyemna. Naragsakda.

Damoda amin nga umadak iti Cagayan. Dida ammo ti turongenda isut gapuna nga inkeddengda itay sakbay a dumsaagda nga urayenda ti panaglawagna sadanto mapan iti pakaangayan ti kumbension.

Alas kuatro ti malem idi agrubbuat da Randolf iti Bantay, Ilocos Sur a yan ti terminal ti Florida Trans. Nangrabiida iti Laoag City sada intuloy ti nagbiahe iti alas siete ti rabii. Makautoy ti panagbiaheda numona ta pekpek ti lugan ken adu dagiti kargamento.

Taga-Ilocos Surda amin. Taga-Vigan City ni Randolf ken Rey. Mangisursuro iti Santiago ni Robert idinto a clerk iti maysa nga opisina ti gobierno ni Freddie. Mannuratda amin ken nasinged ti panaggagayyemda.

Kadakuada nga uppat ni laengen Randolf, ti baro. Agtawenen iti duapulo ket pito, agtayag iti lima kadapan ken innem a pulgada. Napuner ken natagibi ti pammagina babaen iti inaldaw a panagehersisio. Sumimsim met iti arak ngem saan nga agsigarilio. Nagturpos iti journalism iti maysa a nalatak nga unibersidad iti Manila.

Kinapudnona, adu a mannurat a babbalasang ti mangparparimrim ken ni Randolf no adda dagiti seminar wenno workshop nga atendaranna. Saan laeng a mannaniw ni Randolf, nagab-abaken dagiti insalipna a sarita kadagiti pammadayaw. Masansan a maawis nga aglektiur iti panagsurat iti sarita.

Iti dayta nga edadna, adda metten dagiti babbai a nakatnagan ti rikna ni Randolf ngem awan ti nakaigalut kenkuana.

Sangkasuron pay ketdin da Robert, Rey ken Freddie nga “adda kunkuna” ti kinamatsona. Banag nga inkatkatawana laeng.

Mamati a maysa nga aldaw dumtengto ti babai a mamagpitik iti pusona. Iti kanito a dumteng dayta a gundaway, ammonanto lattan a daytoy ti “pangipasaganna” iti kinalalakina.

Madamdama, naglukat dagiti karinderia iti sanguanan ti estasion.

“Intayo pay agkape ket aggurruod ti tiankon,” kinuna ni Freddie.

“Uray dim’ ‘baga, dayta ti aramidenmi,” insungbat ni Rey.

Kalpasan ti panagkapeda, inasitgan ni Randolf ti agtutubo nga agur-uray iti pasahero.

“Ammom ti Callao Caves, padre?” inamad ni Randolf.

“Ti pakaangayan ti Gumil Filipinas National Convention?” kinuna ti drayber. “Umaykayon ta itulodkayo.”

“Mano ti plete?”

“No arkila, agpletekayo iti P120.”

“Nagngina metten,” kinuna ni Freddie.

“Adayo ngamin ti Callao Caves Resort, Manong,” kinuna ti drayber.

“Itulodnakami ngaruden,” kinuna ni Randolf.

Aganay a siam a kilometro ti kaadayo ti Callao Caves Resort manipud iti Tuguegarao. Iti umuna nga innem a kilometro, kongkreto ti kalsada ngem idi simmiasi ti dalan nga agturong iti sakaanan ti bantay, ad-adun ti kabatuan a dalanenda.

Inwaras ni Randolf ti panagkitana. Nadalus ti angin nga ibelbel-a dagiti kayo iti sikigan ti kalsada. Daytoy ti pagaayatna a disso: naulimek ken mariknam ti kinaasidegmo iti Namarsua. Adu la ketdi ti maputarna a sarita no kastoy a lugar ti pagpaknianna.

Simmalog ti traysikel iti igid ti karayan sa nagsardeng.

“Ditoytayon,” kinuna ti drayber sana intudo ti sumang-at a dalan nga agturong iti pakaangayan ti kumbension.

Tinangad ni Randolf ti arko a nakaipaskilan ti Welcome to Gumil Filipinas National Convention. Immanges iti nauneg. Nalagipna ti kinuna ni Rey bayat ti kaaddada iti estasion ti lugan. Ania kadi a gasat ti agur-uray kenkuana iti itatabunoda iti pasken dagiti mannurat nga Ilokano?

(Maituloyto)