Tanod a nangisubli iti kuarta, napadayawan

CANDON CITY –  Pinadayawan dagiti agtuturay ditoy siudad ti maysa a barangay tanod a nangisubli iti napidutna a petaka a naglaon iti kuarta itay nabiit.

Indauluan ni Vice Mayor Alfonso Singson dagiti konsehal a nangiyawat iti plake ti pammadayaw ken ni Benedictor Mecos, residente iti Bagani Campo iti simple a seremonia a naangay iti city hall idi Hunio 27.

Nakapidut ni Mecos  iti petaka  a naglaon iti P19,000 agraman ti $320 ken sumagmamano a Euro idi Hunio 22 ngem intedna daytoy ken ni Barangay Captain Romeo Ramos tapno maisubli ken ni Bernardo Valdez nga akinkukua iti baet a masakit iti dayta nga aldaw.#