Tanod, insublina napidutna a kuarta

CANDON CITY – Adda pay la nalinteg ken mapagpiaran a barangay tanod, Virginia!

Inreport ti DZTP Radio Tirad Pass a maysa a barangay tanod ti nangisubli iti agarup P30,000 a naggian iti petaka a napidutna iti city hall ditoy idi Hunio 23.

Nainaganan ti tanod a ni Benigno Mecos, agpaspasada iti traysikel, ken residente iti Barangay Bagani Campo ditoy siudad, idinto a ni Bernardo Valdez ti akinkukua iti petaka a naglaon iti P19,000, $320 ken napapateg a papeles.

Idi napidut ni Mecos ti petaka, intedna daytoy agraman naggianna ken ni Barangay Captain Romeo Ramos nga isu ti nangipakaammo iti DZTP Radio Tirad Pass para iti pannakaiwaragawagna.

Napalalo a yaman ni Valdez kalpasan a naisubli kenkuana ti petakana ken ti kuartana. Saan a nadakamat iti report no adda naited a gunggona ni Mecos.#