Taong grasa, tinarayan nakadungpar kenkuana

SANTA, Ilocos Sur – Namnamaen dagiti inbestigador ditoy a maammuanda iti mabiit ti kinasiasino ti nangdungpar iti maysa a lalaki iti national highway a sakup ti Barangay Mabilbila Norte, ditoy nga ili idi rabii ti Oktubre 8.

Kinuna ti kapolisan ditoy a maysa a Chevrolet Dagupan nga addaan iti conduction number WC 7184 ti lugan a mapapati a nangdungpar iti saan pay met a nabigbig a biktima kas maibatay iti narekobreda a plastic plate iti nakapasamakan iti aksidente.

Segun iti panagimbestiga dagiti nagresponde a polis iti daydi pannakapasamak ti aksidente, magmagna ti lalaki iti national highway iti paset ti Barangay Mabilbila Norte idi dinungpar ti di nabigbig a lugan.

Intaray dagiti polis ti biktima iti Metro Vigan Cooperative Hospital ngem indeklara ti doktor a nangtaming kenkuana a dead on arrival.

Immun-una ngem daytoy, saan a naiyabot ti biag ti maysa a motorista iti ospital kalpasan a dinungparna ti poste ti alad iti junction iti Barangay Quinarayan, Narvacan agarup 9:50 ti rabii ti Oktubre 7.

Nagresponde a dagus dagiti polis apaman a nakaawatda iti tawag iti selpon manipud iti maysa a di nagpabigbig nga umili, ket idi makadanonda iti nakapasamakan ti aksidente, nadatnganda ti biktima a nakadalutaytay iti abay ti motorsiklona.

Segun iti panagimbestigada, agpaamianan a direksion ti motorsiklo a minaneho ni Jerry Salundaga y Alvarado, 31, natibo iti Abra ngem aggigian iti Barangay Margaay, Narvacan, idi dinungparna ti poste ti akin-amianan a daya nga alad ti junction road.

Intaray dagiti polis ti biktima iti Ilocos Sur District Hospital ngem indeklara ni Dr. Joel Beleno a dead on arrival gapu iti grabe a sugatna iti muging.#