Tapno mapunas duaduada, kokonsehal, kuyogen ti mayor nga agpasiarda iti mabangbangon a Vigan City Convention Center

VIGAN CITY –  Kuyogen ti mayor ti siudad ditoy dagiti konsehal nga agpasiar iti mismo a construction site tapno mapunas aniaman a duaduada mainaig iti mabangbangon a convention center.

Daytoy ti imbatad ni Mayor Eva Marie Singson-Medina kas reaksionna iti panangpapaayab ni Konsehal Constante Benzon iti kontraktor ti proyekto, inhiniero ti siudad ken ti building inspector iti sangguniang panlungsod  tapno mapagsaludsodanda mainaig iti mabangbangon a convention center iti dayaen ti minibus and jeepney terminal ditoy siudad.

Napunduan ti Phase I ti nasao a convention center iti P46,314,885.75.

Kinuna ni Medina a no kayat dagiti konsehal ti malawlawagan, iyawisna ken ni Vice Mayor Lourdes Baquiran nga iyiskediulna ti aldaw ket kuyogenna dagiti amin a konsehal iti mismo a  construction site tapno makitada no nasayaat met laeng ti pannakaar-aramid ti convention center.

Kinuna ni Medina nga uray an-annuen ti kontraktor ken dagiti inhiniero nga  iyeksplikar, saan a maawatan dagiti konsehal no saanda a mapan a mismo a construction site.

Iti naudi a sessionda, impalagip manen ni Benzon ti pannakapaayab dagiti maseknan a kontraktor ken inhiniero tapno maipatalgedda a masursurot ti procedure iti pannakabangonna tapno no “..adda ginggined.. no maysa kadagiti biktima dagiti kabagiantayo, saantayo a makonsensia…”.

Kinuna pay ni Benzon a gapu ta madi met dagiti napaayaban ti agparang iti sangguniang panlungsod, ipaimana iti committee on infrastructure ken committee on oversight a mangkita iti nasao a banag.

Ngem kinuna ni Medina nga uray an-annuen ti kontraktor ken dagiti inhiniero nga ipalawag kadagiti konsehal, saandanto met la a maawatan no saanda a makita, isu nga imbagana ken ni Vice Mayor Baquiran nga awisenna dagiti amin a konsehal a mapan agobserba iti construction site.

“Kasano a masiguradoda a nasayaat ti pannakaaramidna no dida makita a mismo ti site?” kinuna ni Medina.

Innayon ti mayora a kayatna a maikkan dagiti konsehal iti program of work tapno adda pagibasaran dagiti konsehal nga agsaludsod.

“No awan ti program of work, kasano a masiguradom ti klase ti pasdek a maar-aramid?” nakuna ti mayora.

Kinuna ti mayora nga ar-aramiden laeng ti kontraktor ti trabahoda segun iti disenio nga inaramid ti city engineering office.

“No adda problemada iti design wenno iti component ti design, ti city engineer ti pagsaludsodanda,” kinuna ni Medina.

Kinuna pay ni Medina nga iti kallabes, saan a nagpapaayab kadagiti private sector nga agnegnegosio iti Vigan  no adda mairusat a proyekto agsipud ta  mangipaay daytoy iti madi nga impression.

Impatalged ti mayora nga awan ti anomalia a makita dagiti konsehal iti ipapanda iti construction site sana impalagid nga “okay koma no dagiti medio agdudaduda ket napintas ti rekordda.”#