Tapno nabilbileg ti pannakirupak kontra iti droga

Ni Tatang Lakay
(Tuloyna)

Kinuna ni Sen. Vicente Sotto a saan latta a malapdan ti panagraira ti illegal a droga iti pagilian agsipud ta manmano dagiti drug traffickers ti nakonbiktar kadagiti korte gapu kadagiti teknikalidad.

Segun ken ni Sotto, maysa kadagiti gapu iti pannakaibasura, pannakadismis wenno di pannakaituloy dagiti kaso a maipila maikontra kadagiti naaresto a drug traffickers ti pannakapaay dagiti law enforcers a mangprotektar iti integridad dagiti nakumpiska nga illegal a droga kalpasan ti insayangkatda a panagsukisok wenno buy-bust operation.

Inlawlawag pay ni Sotto a no agtultuloy ti panagraira iti operasion ti illegal drug trade, umad-adu dagiti insidente iti panagabuso iti droga nga agtungpal iti pannakaisayangkat dagiti nakaal-alingget a krimen.
Kas nadakamat iti umuna a paset daytoy salaysay, sagudayen ti Section 21 ti RA 9165 ti pannakaiwayat ti inbentario iti lugar a mismo a nakapasamakan iti panagsukisok wenno panagginnatangan iti droga kas paset iti buy-bust operation.

Malaksid iti akusado wenno pannakabagina, kasapulan pay ti presensia ti tallo a saksi iti pannakainbentario dagiti droga, ramit-droga ken dadduma pay a nasamsam iti search wenno buy-bust operation, kas iti nabutosan a public official, pannakabagi ti media ken ti pannakabagi ti Department of Justice.

Ngem gapu iti amak iti mabalin a pannakabalesda, problema dagiti nangiwayat iti panagsukisok wenno buy-bust operation ti pannakaukkon dagiti kasapulan a bilang dagiti saksi iti pannakainbentario dagiti nakumpiskada a droga.

Kasano ngarud a makaluban dagitoy a loopholes tapno nasamsamay ti pannakaipakat ti Comprehensive Dangerous Drugs Act wenno RA 9165?

Dayta ti gapuna nga impursigi dagiti agilinlinteg iti Senado ti pannakaamendar ti Section 21 iti nasao a linteg, kangrunaanna iti pannakainbentario dagiti masamsam wenno makumpiska a droga.

Segun ken ni Senate President Franklin Drilon, iti pannakaamendar ti Comprehensive Dangerous Drugs Act wenno RA No. 9165, saan laeng a dakdakkel ti gundaway a nasamsamay a maipakursong iti pagbaludan dagiti naglabsing iti kaso nga adda pakainaiganna iti droga iti pagilian no di pay malapdan ti pannaka-recycle dagiti nakumpiska nga illegal a droga.

“Babaen dagiti amienda iti Section 21 ti RA 9165, ad-addan a mapabileg ti abilidad ti gobierno a mangikursong kadagiti aglablabsing iti pagbaludan,” kinuna ni Drilon.

Iti babaen ti maipakat nga amienda iti Section 21, mabalinen a mainbentario dagiti nakumpiska a droga iti lugar nga adayo iti peggad iti biag dagiti pannakabagi ti linteg wenno dagiti saksi.

Sagudayen ti amienda a mabalinen a maisayangkat ti inbentario iti kaasitgan a police station wenno iti kaasitgan nga opisina ti opisial wenno bunggoy a nangtiliw iti drug pusher wenno trafficker, aniaman kadakuada ti praktikal a pakaiwayatanna.

Pinabassit metten ti amienda ti bilang dagiti saksi a mangimatang iti pannakainbentario dagiti nakumpiska a droga iti dua laengen manipud iti dati a tallo a pakaibilangan dagiti barangay officials, pannakabagi ti media wenno pannakabagi ti DOJ.

Kasta met nga uray saan a nasurot dagitoy a requirements iti nainkalintegan a gapu, saan a daytoy ti pakainbaliduan dagiti nakumpiska wenno naikustodia a droga, ramit-droga wenno equipo ti laboratorio no la ketdi napreserba a naimbag ti integridad ken ti evidentiary value dagitoy a nakumpiska.

Kinuna pay ni Drilon a babaen ti amienda, mapadarasen ti pannakaiparang dagiti ebidensia ta kasapulanen a maiyisio a dagus ti sertipikasion ti forensic laboratory examination apaman a naawat dagiti nakumpiska a droga.

“Iti daytoy nga amendments, mapabassit ti posibilidad a maresiklo dagiti nakumpiska a droga ket mailakoda manen iti merkado,” nakuna ni Drilon.

Ammo ni Drilon ti sasawenna agsipud ta idi Sekretario ti Hustisia, adda dagiti naduktalanna a kaso dagiti nakumpiska a droga a naresiklo ken nailako iti merkado babaen dagiti rinuker a pannakabagi ti linteg.

Kinuna ni Drilon a no ipresentarda dagiti polis a mangidatag kadagiti nakumpiskada a droga iti korte, ipambar dagitoy a napukaw wenno natakaw ket pinakapsutna ti tsansa a maikulong dagiti drug lords.

Manamnama ngarud ti panangaprobar ni Pres. Aquino III iti naamendaran a RA 9165.#