Tapno nabilbileg ti pannakirupak kontra iti droga

Ni Tatang Lakay

Manamnama a nasamsamay ti pannakaipakat ti linteg kontra kadagiti kaso nga adda pakainaigan iti droga no aprobaran ni Presidente Benigno Aquino III ti pannakaamendar ti Republic Act 9165 wenno Dangerours Drugs Act of 2002.

Maipalagip a sakbay ti panaggibus ti Umuna a Regular Session, inaprobaran ti Senado ti Senate Bill No. 2273 ken House Bill No. 2285 a mangamendar iti RA 9165 kas paset ti gagem ti gobierno a nasaysayud ti pannakaipakat iti linteg maikontra kadagiti drug-related cases.

Kangrunaan a puntiria dagiti agilinlinteg a naamendaran ti Section 21 ti RA 9165, nga ibilang dagiti anti-illegal drug advocates a dakkel nga abut a lumsotan dagiti drug lords wenno drug traffickers.

Ania ngamin ti ibagbaga ti Section 21 ti RA 9165?

Kas sagudayen ti Section 21 (1-3), kasapulan a maiwayat a madagdagus ti pannakainbentario dagiti droga apaman a nakumpiska ken nasamsamda, ken iti pannakaretratoda iti sanguanan ti akusado wenno ti akimbalay a mismo a nakakumpiskaan ken nakasamsaman dagitoy, wenno iti pannakabagina wenno abogadona, pannakabagi ti media ken ti Department of Justice, ken asinoman a nabutosan a public official a kasapulan nga agpirma kadagiti kopia iti inbentario ken maikkanda iti kopiada.

Iti uneg ti duapulo ket uppat nga oras, masapul a maisubmite dagiti nakumpiska wenno nasamsam a droga iti PDEA Forensic Laboratory para iti pannakaamirisda.

Iti uneg ti 24 nga oras, mangaramid ti forensic laboratory examiner iti nasapataan a sertipikasion iti resulta ti panangamirisna kadagiti nakumpiska wenno nasamsam a droga. No dakkel ti volume ti maamiris a droga, mangiyisio ti examiner iti partial a report iti laboratory examionation ngem mailanad ti kuantidad ti droga a maeksamento pay laeng. Ketdi, mangiyisio ti examiner iti pinal a sertipikasion iti kumnpleto a panagamirisna iti las-ud ti sumaruno a 24 nga oras.

Kalpasan ti pannakaipila ti kaso a kriminal maikontra iti nakasamsaman iti drogra, iti uneg ti 72 nga oras, mangiwayat ti korte iti ocular inspection kadagiti nakumpiska, nasamsam ken wenno naisuko a droga ken wenno dagiti instrumento/paraphernalia ken wenno laboratory equipment ket babaen iti PDEA, iti las-ud iti 24 oras, madadael wenno mapuoran dagitoy iti sanguanan ti akusado wenno iti tao a nakasamsamanda, wenno iti pannakabagina wenno abogadona, pannakabagi ti media ken ti DOK, civil society groups wenno asinoman a nabutosan a public official.

Ti naglabsing ti mangibaklay iti pannakadadael wenno disposision dagiti nasamsam, ket no adda man maidonar wenno mairesiklo para iti lehitimo a panggep, ti Board ti makaammo a mangaramid kadagiti pagannurotan.

Bassit laeng ti mabati a droga ket matimbang ken mairekord daytoy.

Iti panangbukitkit iti Section 21, nasiken ken nalawag daytoy. Ngem apay a kuna dagiti anti-illegal drugs advocate a loophole wenno abut a lumsotan dagiti drug dealers wenno traffickers?

Kuna ni Sotto, nagbalin ti Section 21 a saan a praktikal ken napeggad para kadagiti pannakabagi ti linteg ken dagiti tattao a kasapulan a mangimatang iti pannakaiwayat ti inbentario iti droga iti lugar a nakasamsaman ken nakakumpiskaanda.

Kinuna ni Sotto nga addaan iti kapasidad dagiti drug traffickers a mangiyussuat iti kontra-atake a mamagpeggad iti biag dagiti law enforcers ken dagiti kasapulan a mangimatang iti inbentario dagiti nasamsam a droga agsipud ta saanda laeng nga organisado ken dakkel ti pundoda, addaanda pay iti back-up a nabibileg a lokal ken internasional a sindikato.

Adda puntos ni Senador Sotto. Aniaman a maraut a laboratorio ti droga, makumpiska wenno masamsam a droga, ramit-droga wenno paraphernalia ket agtinnag a pukaw ti sindikato. Posible pay a pakapukolan ti negosioda iti dayta a teritorio agsipud ta kapilitan nga isardengda ti operasionda iti dayta a lugar bayat ti panagurayda iti “ilalamiis” ti tiempo. Ken kangrunaan, agbalin dagiti nasamsam a droga nga ebidensia a mangitalmeg iti nakemmeg a kameng ti sindikato ken pakaikursonganna iti pagbaludan.

Ngarud, dakkel a pagpeggadan ti sanguen dagiti pannakabagi ti linteg ken dagiti kimmuyog iti operasion iti pannakasaluad iti integridad dagiti nasamsam wenno nakumpiska a droga tapno nalagda ken natibker dagitoy nga ebidensia maikontra iti tao a nakasamsamanda.

(Adda tuloyna)