sinursuran-banner-sqSinursuranNi Jobert M. Pacnis

Tapno Natibker ti Pagbalay a Haloblak

Kolum : Sinursuran

Ni Jobert M. Pacnis

  (Maudi a paset)

 

Iti agarup sangaribu kilo (1 000 kg) nga irik, 220 kilo itoy ti taep. Kadaytoy a kaadu, mapan a 55 a kilo ti dapo a maurnong no mapuoran. Gapu ta addaan ti pozzolan iti dapo manipud iti taep, napintas daytoy a mailaok iti aramiden a concrete. Iti pay panagadal, mapan a 35 microns ti particle dagiti komersialado a semento idinto a 25 microns laeng ti dapo ti taep. Kayatna a sawen daytoy, no yarigtayo iti sagatan, napimpino nga amang ti dapo. Ngarud, malapdan ti iseserrek ti angin ken ti di kasapulan a danum iti haloblaks (wenno ania man a concrete) a panggapuan ti nalaklaka a pannakadadaelna.

Innem dagiti naipakita iti proyekto a treatment wenno mixture nga addaan iti nadumaduma a kinatibker (strength) maikompara kadagiti am-ammotayo a class A, class B, wenno class C a klase ti haloblaks.

Dagiti mixture, umuna: 40 kg Portland cement, 0 kg magnetites, 0 kg a dapo ti ukis ti dawa (rice husk ash), 570 kg a bato ken darat (aggregates), ken 6 a galon ti danum; maikadua: 40 kg a semento, 60 kg magnetites, 0 kg rice husk ash, 510 kg aggregates ken 6 gallon a danum; maikatlo: 40 kg cement, 0 kg magnetites, 60 kg rice husk ash, 510 kg aggregates ken 6 gallon a danum; maikapat: 40 kg cement, 30 kg magnetites, 30 kg rice husk ash, 510 kg aggregates ken 6 gallon a danum; maikalima: 40 kg cement, 45 kg magnetites, 15 kg rice husk ash, 510 kg aggregates ken 6 gallon a danum; ken maikanem: 40 kg cement, 15 kg magnetites, 45 kg aggregates 510 kg aggregates ken 6 gallon a danum.

Kadagupan dagitoy, ti maikapat a mixture ti makuna a Class A. Mamindua a daras daytoy a natibtibker ngem iti am-ammotayo a class A a komersial a haloblaks nupay maikadua laeng iti puesto no kinatibker ti pagsasaritaan. Saan met ketdi nga adayo ti baetda iti immuna (ti maikadua a mixture). Ngem daytoy ketdi ti umuna iti benneg ti less water absorbs wenno iti masagepsep a danum.

No gupgopen kano ti puntos, ti pay laeng maikapat a treatment ti kapintasan.

Agtibker ti nasao a mixture iti 252 psi (pound per square inch) idinto a 124 psi laeng kadagiti komersial. Kayatna a sawen, 252 (agarup 114.5 kilo) a libra a dagsen iti kada kuadrado pulgada ti  kabaelan a suportaran ti nasao a haloblaks a naaramid kadayta a mixture.

Madika pay kadayta idinto a dimo met bayadan ti inlaokmo? Maysa pay, saan unay nga agsipsip iti danum ti haloblaks a pakaigapuan koma ti nalaklaka a panagrukopna. Gapu daytoy iti napino a dapo a manglapped iti iseserrek ti danum ken angin iti nagbabaetan dagiti mixture. Ken siempre, naan-andur met laeng iti kalamidad  ti ipatakdermo a balay weno establisimiento.

Pinaneknekan dagiti otoridad daytoy a takuat. Nagdalan dagiti naaramid a haloblaks iti Universal Testing Machine (UTM) ti Department of Public Works and Highways (DPWH).

Kas nasaon, saan a nangina daytoy a wagas. Iti nasao a sukisok, mapan laeng a P4.85 ti bayad ti maysa a haloblaks iti umuna a mixture; P4.37 iti maikadua; P3.57 iti maikatlo; P3.94 iti maikapat, P3.66 iti maikalima idinto a P3.60 iti maikanem. Agnayonka laeng iti P2 no gatangem ta mairaman ditoy ti bayad ti nagaramid (labor cost).

Idi naaramid daytoy a proyekto, mapan a P7.00 ti maysa a haloblak a commercial (P8.00 itan plus delivery). Di kad’ rumrummuar a nalaklaka ti natakuatan ken natibtibker pay nga amang. Madika pay?

Ala, napintas ngarud no daytoy a takuat ti maysa a haiskul ket maaramid tapno pagnumaran. A no ipapati a suroten, ania ti ammotayo, no isunton ti pagluposan ti panagbiagtayo (kas nakunan)?#