sinursuran-banner-sqSinursuranNi Jobert M. Pacnis

Tapno Natibker ti Pagbalay a Haloblak

Kolum : Sinursuran

Ni Jobert M. Pacnis

  (Umuna a paset)

 

IDI gimmatangka iti haloblak a pinagbalaymo, kalanglang iti Sinursuran, ania ti nadlawmo? Agkarabettak kadi idi bagkaten dagiti trabahadormo? Awan la’t bassit a puersa, matippingan wenno maburaken daytoy?

Ayna, saan laeng a sika ti nakadlaw iti kinarasi dagita a komersialisado a haloblak. Kinapudnona, adu ti agkudkudkod laengen kadagiti uloda no kasta a matakuatanda a NO CLASS gayam dayta Class A wenno Class B a ginatangda a haloblak.

Pagangayanna, dakkel ti masayang a kuarta. Nagngina pay met ngarud itan dagiti haloblak!

Ngem ditayo koman masdaaw. Negosio dayta. Kayat dagiti negosiante ti agganansia iti kasta unay isu a permi a paruarenda a haloblak iti maysa laeng a bag ti semento.

Ngarud, bagitayo lattan a gumatgatang ti agan-anus. Narigat sa met ti agbalay iti puro buhos! Isu a kapilitan latta ti igagatang kadagiti komersialisado a haloblak.

Awan pagpilian.

Di kad’ nasaysayaat sa laengen no agaramidtayo iti bukodtayo a haloblak? Usarentayto no kasapulan. Di la mammamin-ano ti panagkasapulan kadagitoy. Uray ta di met madadael uray nabayag. Lumaglagda pay ketdi no mataripato iti panaglabas ti panawen.

Ken no adda kawadwadan ti puonan, mabalin metten ti agnegosio (iti dekalidad, a). Masiguradotayo a nalagda no bukodtayo nga aramid. Ken ania ti ammotayo no daytoyto metten ti pagluposan ti biagtayo no makita dagiti kalugarantayo a dekalidad dagiti partuattayo? Ken nalaka pay!

Ania ngarud ti aramidentayo?

Malagipko ita ti maysa nga investigative project nga insayangkat ti maysa nga agad-adal iti haiskul ditoy lugarmi, lima a tawenen ti napalabas. Saan laeng a nangabak daytoy iti probinsiami no di ket iti sibubukel a pagilian. Kualipikado koma pay a maisalip  idiay Atlanta, Georgia USA. Ngem saanen a simmalip ti ubing iti sabali a pagilian ta usarennaa la kanon a pagkolehio ti gastuenna.

Ala, kitaentayo man ngarud daytoy a takuat ti maysa idi nga agad-adal iti haiskul:

Kas nasaon, naitalimudok ti sukisok maipanggep iti pannakanayon ti tibker dagiti maaramid a hollow blocks babaen ti pannakaaramat dagiti adda laeng iti aglawlaw a kinabaknang a no maminsan ket  ditayo ikaskaso kas koma iti maibalballeng laeng a taep (rice husk),  darat ti baybay (a pagkukurtaan laeng ita dagiti agminminas a ganggannaet a suportado pay dagiti lokal a lider ta dakkel met ti makabukab a kuarta) wenno magnetite. Napauluan daytoy iti Increasing the Compressive Strength and Lessening the Water Absorbency of Hollow blocks.

Di kad’ nasaysayaat sa no datayo nga umili ti agnumar iti uray saggabassit laeng kadagita a darat iti baybay? Adayo met siguro a madadael ti aplaya no agalatayo laeng para iti kasapulantayo a saggabassit. Saan a kas kadagita agminmina nga arig ikisapda aminen.

Iti proyekto, immuna a naadal no ania dagiti ramen ti semento a mangpatpatibker kadagiti maaramid a haloblak wenno ania man a maaramid manipud itoy. Ditoy a natakuatan ti maipapan kadagiti elemento a silica, iron ken natural pozzolan— dagiti kangrunaan a ramen ti semento.

Naigaed ti panagadal kadagiti banag nga addaan kadagitoy nga elemento. Dita a natakuatan ti taep ken darat ti baybay. Nabaknang ti taep iti silica (85-90 porsiento) ken natural pozzolan idinto nga iron met iti darat ti baybay.

(Adda tuloyna)