Tapno saan a maawan ti pagtalonan:
Pannakainget ti land conversion, kiddaw ti DAR Secretary

CAOAYAN, Ilocos Sur β€” Nasken ti pannakapainget ti land conversion kadagiti agricultural lands wenno kataltalonan ta adun dagiti nagbalin a residential and commercial lands tapno malapdan ti agtultuloy nga ibabassit dagiti daga a mamulaan kadagiti pagay, nateng, mais ken dadduma pay a mula ti agrikultura.

Dayta ti ballaag ken kiddaw ni Agrarian Reform Secretary John Castriciones kabayatan ti naangay a press conference idi Pebrero 28, 2020 sadiay Nueva Segovia Consortium of Cooperatives Plaza iti daytoy nga ili. Kadua ti DAR Secretary dagiti dadduma pay nga opisial ti ahensia pakairaman dagiti undersecretary, Regional Director Homer Tobias ken Provincial Agrarian Reform Officer iti Ilocos Sur a ni Ms. Christianne Sugiten. Naangay ti komperensia kalpasan ti Agrarian Reform Beneficiaries Summit ken panagiwaras kadagiti titulo a dinar-ayan dagiti lider dagiti gunglo dagiti mannalon.

Impalgak ni Sec. Castriciones nga iti agtultuloy a programa ti DAR a panagiwarasda iti titulo kadagiti benepisario ket nasken a saluadanda dagiti dagada ket mataginayonda a pagmulaan wenno agricultural land tapno malapdan ti panagbalin dagiti mamulmulaan a residential, commercial and industrial lands a mapaspasamaken kadagiti nagduduma a probinsia iti Pilipinas.

β€œMahirap pigilan ang mga magsasaka kung magpatayo ng bahay sa bahagi ng kanilang lupang sinasaka lalo na kung yon lang ang kanyang pag-aari,” kinuna ni Sec. Castriciones iti panangaklonna nga adun a kataltalonan dagiti nabalayan. Inlawlawagna a manipud iti maysa a balay dagiti agassawa nga akinkukua ti daga ket immadun ta nagbalay metten dagiti nagaassawa nga annakda a naaddaanen iti bukod a pamilia.

Inlawlawag ti DAR Secretary a ti pannakaipalubos ti land conversion ket saan nga akem ti departamentoda, ngem responsibilidad dayta dagiti akinsakup a local government unit. Indariragna ti istrikto a pannakaipatungpal dagiti pagannurotan iti land conversion dagiti agricultural land ta no agtultuloy ti panagbalin dagiti kataltalonan a residential, commercial, industrial land ket agtultuloy nga umilet dagiti pagtalonan ket bumassit dagiti agricultural products, ngumina ti presioda, ken agdependerton iti panagangkat iti sabali a pagilian.

Impakaammo ni Sec. Castriciones nga agtululoy ti pannakabingbingay dagiti nalawa a daga kadagiti AR beneficiaries, ken nakairawarasen ti DAR iti 1.368 milion nga ektaria kadagiti benepisario. Impasingkedna nga ikagumaan ti DAR nga iwaras amin dagiti amin a daga a karaman iti Agrarian Reform Program agingga inton Hunio 2022 a panaggibus ti termino ni Presidente Rodrigo Duterte.

Kalaksidan ti panagiwaras kadagiti daga kadagiti AR beneficiaries, nairakurak pay iti kaadda dagiti nagduduma a programa ti DAR a makatulong kadagiti mannalon kas ti pannakabangon dagiti farm-to-market roads, pannakaiwaras dagiti farm equipments, pannakaipatakder dagiti water supply-irrigation facilities ken panagpautang kadagiti benepisario a mannalon iti nababa nga interes (2.8%) iti tinawen.

Iti Ilocos Sur, naammuan a nalpasen ti panagiwaras ti DAR iti daga kadagiti benepisario, ngem agtultuloy a maipaay dagiti programa a mangtulong kadagiti AR communities and beneficiaries iti probinsia.

Naammuan nga adda kadagupan a 46 nga Agrarian Reform Communities iti Ilocos Sur – 14 iti 1st District, ken 32 iti 2nd District.

Addaan met ti Ilocos Sur iti kadagupan a 56 Agrarian Reform Organizations. Adda 17 iti 1st District a buklen ti dua a rural waterworks, dua nga irrigators associations, ken 13 a kooperatiba. Adda met 39 iti 2nd District a buklen dagiti lima nga irrigators associations, dua a farmers association ken 32 a kooperatiba. ●