Footer

Taraken a malaga, nagpatay

CANDON CITY – Nagballaag ti city agriculture office ditoy a posible a  kumaro ti panagpatay dagiti taraken nga ikan ditoy siudad.

Naireport itay nabiit iti nasao nga opisina ti panagpatay ti sumagmamano a pupok a malaga a matartaraken iti karayan iti Barangay Paypayad ditoy.

Inlawlawag ni Elmor Leano, city agriculturist, a ti panagbaliw ti panawen ti maysa kadagiti makagapu iti panagpatay dagiti pupok a malaga iti nasao a barangay.

“Ti pumudpudoten a tiempo, nakisang nga oksiheno nga angsen dagiti lames ken ti panagapgad ti danum gapu iti ikikidddit ti tamnay-karayan dagiti kangrunaan a rason no apay a nagpatay dagiti taraken a malaga,” kinuna ni Leano.

Kinuna nga agpudot ti panawen manipud iti Enero agingga iti Mayo ket agpatay dagiti lames ta dida kabaelan ti panagbaliw ti tiempo.

Kinunana pay a mabalin a kadagiti masungad nga aldaw, saan laeng a dagiti malaga ti posible nga agpatay nangruna ket pumudpudot ken umap-apgad ti danum kadagiti karayan a yan dagiti payaw ken pupokan.

“Ti panagapiten kadagiti mabalinen nga ilako nga ikan ti kapintasan nga aramiden dagiti agtartaraken tapno saan a mairaman dagitoy a matay,” kinuna ni Leano.#