Taraon Dagiti Didiosen

MAYSA a diputado ti nangisingasing a mairehistro amin a prepaid cellular phone tapno malapdan ti panagraira iti panagtakaw iti cell phone.

Iti panirigan ni Dip. Joseph Santiago, pannakabagi ti distrito ti Catanduanes, agpangadua dagiti mannipdut no mairehistro dagiti prepaid cell phones agsipud ta nalakanto a matuntonan ti akinkukua dagitoy a ramit-komunikasion.

No bukitkiten ti kangrunaan a panggep ti nasao a proposal, napunno iti abut – abut nga uray ti dakkel a bagi ni Santiago ket lumsot.

Umuna a saludsod: Iti pannakairehistro dagiti cellphone mapengdan kadi a takawen wenno sipduten dagiti tattao a baribar ti panagpampanunotda daytoy a ramit-komunikasion? Adayo a mapasamak dayta. Dagiti cellphone ti kadarasan a sibbaruten wenno libasen nga ibulsa dagiti mannanakaw.

Kanaig daytoy, apay nga agtultuloy latta ti carnapping idinto a nakarehistro met dagitoy a lugan?

Ala, ket adu pay ti gadgets dagitoy a naikabit kas iti alarm system nga agariwawa no adda agpanggep a manglukat iti kotse. Wenno adda dagiti guardia kadagiti pagparkingan. Ngem iti baet dagitoy, adu met latta dagiti mataktakaw.

Kasta met a kadagiti sabali a natutured a mannanakaw, ibalanganda lattan ti luganda iti pagnaan ti puntiriada a lugan, dagus a paturonganda iti paltog dagiti naglugan ket pronto, italawdan ti lugan agraman dagiti naglugan.

Ngarud, iti umuna a panagkita, saan a lapped ti pannakairehistro ti maysa a banag tapno saan a matakaw.

Maikadua: Iti pannakairehistro dagiti amin a prepaid cellphone, agbusbos la ketdi dagiti kompania iti dakkel para iti accounting ken storage data. Salsaludsoden ti TXTPower no sino ti mangibaklay iti mabusbos. Dakkel ti posibilidad nga ipabaklay manen dagitoy a kompania ti mabusbos kadagiti agar-aramat wenno consumers.

Saan pay a malipatan dagiti consumers nga iti baet ti kadakkel ti mapaspastrek dagiti kompania ti komunikasion iti pagilian, kinissayanda pay ti libre a text messages. Nagriri nga agpayso dagiti consumers ngem nagbalin a tuleng dagiti kompania ti komunikasion. Pambarda a kayatda a sumaysayaat pay ti serbisio kadagiti agar-aramat.

Tell that to the marines, kuna ti maysa nga am-ammomi a magusgustuanna ti makitungtong kadagiti gagayyemna babaen iti text ngem saan a mamati iti palusot dagiti kompania ti komunikasion.

Wen, met, agdadata nga iyal-alisda ti alipuspos dagiti tattao.

Nasaysayaat pay ketdi koma nga ibagada nga agkurkurang ti bilion a mapaspastrekda iti tinawen ket kayatda nga umad-adu pay tapno naburburnok ti mapanda ideposito kadagiti bangko!

Ngem mabalin a masiriptayo ti lohika no apay a kastoy ti insingasing ni Dip. Santiago.

Taldiapentayo ti naggapuanna sakbay a nagbalin a diputado. Dati a komisioner ni Santiago iti National Communications (NTC) ken kameng ti Nationalist People’s Coalition, partido a pro-Estrada.

Daytoy ti posible a masirip ti TXTPower ta kinunana a politically motivated ti singasing ni Santiago.

Iti panirigan ti TXTPower, pangrugian a tignay ti pannakairehistro dagiti prepaid cellphones a mangsensor kadagiti text messages ken pannakasiput dagiti agar-aramat iti cellphone.

Saanton a pribado ti kinasiasino ti agar-aramat iti cellphone, no sino ti pangipatpatulodanna iti mensahe, no ania ti linaon ti mensahe ken kasano kadaras ti panagtinnawag wenno panangipatulodda iti text message.

Kasanon no dagiti mensahe ket maikontra iti gobierno, wenno panagkunniber dagiti opisial?

Posible a mapasamak dagitoy aglalo no iti babaen ti maysa a gobierno a kayatna nga awan ti rummuar a nabileg nga oposision wenno napigsa a kritiko maikontra kadagiti rinuker nga agtuturay.

Saantayo pay a malipatan ti napasamak idi sakbay ken katibok ti impeachment trial ni napadisi a Pres. Estrada. Adda dagiti sayangguseng idi a namonitor dagiti oposision a politiko, lider dagiti kontra-Estrada babaen dagiti teleponoda.

Pagarigan laengen ni Salvador “Bubby” Dacer. Timmawag ken ni nag-Presidente Fidel Ramos sakbay ti panagsarakda iti maysa nga otel. Saan a nakadanon ni Dacer iti destinasionna ta iti dalan, intalaw dagiti armado a lallaki. Suspetsa dagiti mangsursurot iti kaso a nasipsiputan ti garaw ni Dacer babaen ti telepono wenno cellphonena.

Nakitatayo ti kinapardas ti komunikasion babaen iti cellphone idi Edsa II. Nakitatayo ti panagbalinna a nabileg nga instrumento iti pannakairusat dagiti tignay protesta ken uray iti gubat.

No apay a plano daytoy ti NTC ti narigat a maawatan. Ania ti itaktakderanna: dagiti umili wenno dagiti higante a kompania ti telekomunikasion? Kumplot kadi ti NTC dagiti kompania ti komunikasion? Adda kadi lutlutuenda a potahe a kayatda nga idasar tapno agbalinda a taraon dagiti didiosen?

Daytoy ti masapul a siputan dagiti umili aglalo dagiti consumers dagiti prepaid cellphone.#